Bishar ka Myntri khynnah ka Tnad Sports jong ka Sorkar Pdeng ïa ki jingthmu pynroi bad ka Sorkar M’laya

Shillong, Jymmang 29: Ka Myntri khynnah ka tnad Sports & Youth Affairs jong ka Sorkar Pdeng, ka Raksha Khadse ka la pynïaid ïa ka jingïalang bishar bñiah ban buddien ïa ki kam ïalehkai bad ki jingthmu pynroi kiba dang ïaid ha ka jylla, kumjuh ruh ban wad ki lad ki lynti ban pynkhlaiñ ïa ka jingïatreilang hapdeng ka Sorkar Pdeng bad ka Sorkar Jylla.
Ha kane ka jingïalang la ïashim bynta lang da u Myntri ka tnad Sports ka jylla – bah Wailadmiki Shylla, Dr. Vijay Kumar D, Commissioner & Secretary ka Sorkar Meghalaya, ki heh ophisar na ka sorkar Meghalaya, Sports Authority of India, ka Meghalaya State Olympic Association bad kiwei kiwei ki nongshim bynta kiba ïadei bad ka kam ïalehkai.
Ha kane ka jingïalang, la ïoh ban ïatai sani bha halor ka kam ïalehkai ha Meghalaya, ki jingthmu ban pynïadei bad ki samla, ki projek bad ki prokram pynroi ïa ki nongïalehkai kiba thmu ban pynkhlaiñ ïa ka jingïashim bynta bad ban thaw ïa ki lad ki lynti na ka bynta ka kam ïalehkai ba paka.
Ka Sorkar Jylla ka la wanrah ïa ki jingthmu bapher bapher kiba ka la shim ban kyrshan ïa ki klob ïalehkai, ki synjuk ïalehkai bad ki nongïalehkai, kynthup ïa ki lad jingkyrshan ba la ai na ka bynta ki samla bad ki kam kiba ïadei bad ka Sports, ki skhim pynroi samla bad ki prokram ai jingïarap na ka bynta ki nongïalehkai. Ki heh sorkar ki la pyntip ba haduh kumba 900 ngut ki nongïalehkai ki dang ïoh jingkyrshan mynta na ka skhim State Sports Scholarship.
La pynlong ruh ïa ka jingïakren halor ki jingthmu ba kongsan jong ka Meghalaya ïa ka phutbol hapoh ka Chief Minister’s Football Mission. Ki heh sorkar ki la pynpaw ba kane ka jingthmu ka treikam mynta lyngba ki 125 tylli ki grassroots centre, ka kyrshan ïa jan 10,000 ngut ki nongïalehkai bad ka la noh synñiang ban pynmih ïa ki katto katne ki nongïalehkai phutbol ba mih madan ïa ka ri na Meghalaya.
Kane ka jingïakren ka kynthup ruh ïa ki jingthmu jong ka Meghalaya ban pynkhlaiñ ïa ki jingtei jaka ïalehkai ha ka jylla, kynthup ïa ka Mawkhanu Football Stadium, kaba la khmihlynti kum kawei na ki madan phutbol kaba heh tam ha ka thaiñ bad kaba la khmihlynti kum ka jaka kaba lah ban pynlong ïa ka jingïalang plie ïa ka National Games. La bishar ruh ïa ki kam pynroi kiba kynthup ïa ka Umsawli Sports Complex bad ka Slalom Course ha Umtham.
Ka Raksha Khadse ka la ban jur ïa ka jingdonkam ban pynkhlaiñ ïa ka kam ïalehkai naduh tynrai, ban kyntiew ïa ka jingïashim bynta jong ki samla bad ban pynthikna ïa ka jingïatylli hapdeng ki jingthmu jong ka Sorkar Pdeng bad ka Jylla ban wanrah ïa ka jingktah kaba khraw.
Kane ka jingïalang ka la bishar bñiah ruh ïa ki jingthmu jong ka Meghalaya bad ïadei bad ki samla, kynthup ïa ka Youth Engagement and Empowerment Scheme for Students (YESS Meghalaya), ha kaba la pyniar ïa ka jingkyrshan sha ki klob bad ki synjuk ïalehkai kiba pynlong ïa ki prokram pynroi ba ïadei bad ki samla.
La ïatai ruh halor ka bynta jong ka MY Bharat ha kaba pynïar ïa ka jingïashim bynta jong ki samla bad ka jingïatreilang jong ki nongtrei mon sngewbha, khamtam ha kaba ïadei bad ka jingthaw ïa ki lad trei mon sngewbha na ka bynta ki jingïalehkai ki ban sa wan, kynthup ïa ka National Games, lyngba ka portal jong ka MY Bharat.
Ki nongmihkhmat jong ka MSOA, ba kynthup ïa u Working President bah John F. Kharshiing; u bah EMH Passah, Pynbiang Laloo-Joint Secretary, bah Ksan Kupar Warjri Treasurerki la ïashim bynta ha kane ka jingïakren.
Ka Raksha Khadse ka la ban jur ruh ïa ka jingdonkam ban pynkhlaiñ ïa ki shlem ai jinghikai ba la pynskhem da ka Khelo India bad ban pynïahap ïa ki jingtei jaka ïalehkai jong ka jylla bad ki rukom pynroi ïa ki nongïalehkai.
La pynlong ruh ïa ka jingïakren ha kaba ïadei bad ka Meghalaya Games bad ka jingthmu ban kyntiew ïa ki nongïalehkai ha ka por kaba neh slem.
Ka Raksha Khadse ka la pynpaw biang ïa ka jingkular jong ka Tnad ban ïatreilang bad ka Meghalaya ban pynkhlaiñ ïa ki jingtei ha ka kam ïalehkai, ki rukom kyrshan ïa ki nongïalehkai bad ki jingthmu ban kyntiew ïa ki samla ha kylleng ka jylla bad ka thaiñ shatei lammihngi.
Ka la kdew ba ka Meghalaya ka don shibun ki sap kiba khraw ha ka kam ïalehkai, bad ka la ban jur ba ka jingïatreilang hapdeng ka Sorkar Pdeng, ka Sorkar Jylla, ki jaka ïalehkai kan long ka bynta kaba kongsan ha kaba pynroi ïa ki sap bad ban kyntiew ïa ka jingthmu jong ka kolshor ïalehkai kaba khlaiñ ha ka ri.