Plie paidbah u Conrad Sangma ïa ki mawnongrim shna surok ha ka jingmang tyngka kaba 600 klur

Khliehriat Jymmang 28: U Myntri rangbah ka jylla, u Conrad.K.Sangma mynta ka sngi ha ka jingialang ba la pynlong ha shnong Latyrke, East Jaiñtia Hills District, u la plie paidah ïa ki lai tylli ki maw nongrim kiba dei ki project ban shna surok kiba ha ka mang tyngka kana haduh T 600 klur tyngka bad ong ruh ba kane ka dei kawei na ki project kaba heh tam kaba wan na ka mang tyngka jong ka World Bank.
Ki lai tylli ki maw nongrim kiba la plie paidbah ha Latyrke, ki kynthup ka project shna surok kaba naduh Dkhiah, sha Sutnga, Saipung ter ter shaduh moulsei.
Kawei pat ka project shna surok kaba naduh Dkhiah sha Sutnga, Saipung, Pala, Samasi Road kaba haduh 28 kilo mitar.
Shuh shuh, kawei ruh ka project shna surok kaban poi shaduh ba don ka kshaid Chympe ha Khaddum kaba naduh Seijrongheng sha Sutnga bad ter ter shaduh Khaddum.
Haba kren ha ka jingialang u Conrad Sangma u la ong “Mynta ka sngi ha kane ka jingialang plie maw nongrim, ka dei kawei na ki project kaba heh tam ha kaba iadei bad ka mang tyngka kaba wan na ka world bank ba ngi la ïoh bad ka dei kane ka project kaba haduh T 600 klur tyngka ha kaba la plie ia ki lai tylli ki maw nongrim bad kane ka dei kata ka roi, ka kiew kaba ngi ngeit bad ngi khmihlynti ka ban kyntiew ia ka khaïi pateng ad kyntiew ïa ka ïoh ka kot”
U myntri rangbah ka jylla,u la ai ka jingiaroh ïa ka MLA, Santa Mary Shylla bad ong ba ka wan leit mih sha ophis u myntri rangbah na ka bynta ki kam ban pynbit pynbiang ïa ka constituency, haba ka wan bad ka ju kyrpad halor kane ka project shna surok bad mynta la lah ban plie ïa ki maw nongrim “nga khmihlynti ba lada nga wan biang shan kane ka thaiñ ban ialap election ha u snem 2028 ngan ïoh ban iaid na kane ka surok thymmai bad ngin sa nang iakren shuh shuh ruh na ka bynta kiwei kiwei ki project kiba heh kiba dei ki surok kiba lah bban pyniasoh shuh shuh sa bad kiwei kiwei ki shnong kiba don ha ka thaiñ, ngin sa nang iaid shakhmat shuh shuh ha kaba kyntiew ïa ka roi ka par hapoh ka jylla, mynta ha Latyrke da ka jingieid u Blei bad da ka jingkyrhsan lang ki paidbah, ngi la lah ban ban ai ka jingshakri ïa ki nongshong shnong ka jylla watla la bun-bun snem ba ngi mad bun ki jingeh, jingialeh ha ka jingiaid lynti bad nga kmen ba ka Meghalaya ka don ha ka lynti kaba dei, ba ka jylla Meghalaya ka dei ka jylla kaba kiew stet bha ha ka kam khaïi pateng hapoh ka ri India, mynta u snem ruh ka jylla Meghalaya ka wan ha ka kyrdan ba nyngkong eh ha ka jingkiew stet ha ka khaïi pateng, namar ha ki snem kiba la leit ka jylla ka dei kaba sahdien bha ha ki kam khaïi pateng bad ha ki kam pynroi, hynrei mynta ngi la don ha ka kyrdan kaba halor bad hakhmat duh,nga ong ïa kane namar wat hapdeng bun ki jingeh bad jingialeh kiba bun kiba ngi iakynduh hynrei ngi la shim ïa ki synjam ban iaid beit shakhmat ban kyntiew ïa ka jylla, haba kren ïa ka jingkiew ha ka khaïi pateng, ngin shim ban kyntiew tang ia kawei ka thaiñ, hynrei ngin kyntiew ïa baroh ki thaiñ ba hapoh ka jylla bad mynta ha kane ka prokram ruh ka paw shai ba ka jingkiew ka dei ha baroh ki thaiñ ha ka jylla” ong u Conrad Sangma.
Na ka liang ka MLA jong ka Sutnga Saipung Constituency, ka kong Santa Mary Shylla ka la ai ka jingkhublei sngewnguh ïa u myntri rangbah, u Conrad Sangma ba u la lah ban pynurlong ïa kane ka project shna surok kaba la kot haduh T600 klur tyngka bad ong ba kane kan iarap shibun shibun ïa ki paidah jong ka constituency ha ka leit ka wan khamtam ha kaba kyntiew ïa ka ïoh ka kot ha ka thaiñ bad ong ruh ba ka constituecy jong ka kam pat ju ïoh kano kano ka kam pynroi ha ki por kiba la leit hynrei dei tang kane ka sorkar MDA ba lam khmat da u Conrad Samgma ba ka Sutnga Saipung Constituency ka ïoh ïa ki project bapher bapher kiba dei ki kam pynroi ban kyntiew ïa ka ïoh ka kot jong ki paidbah, ka la ong ruh ba da ka jingwanrah ïa kane ka project shna surok kan iarap shikatdei eh ha kaba kyntiew ïa ka roi ka kiew.
Kiba la ia don ryngkat ha kane ka jingialang ha Latyrke ki kynthup u Symbud Myntri rangbah, u bah Sñiawbhalang Dhar, ka MLA Sutnga – Saipung ka kong Santa Mary Shylla, u MLA jong ka Khliehriat u bah Kyrmen Shylla, u Deputy Commissioner East Jaiñtia Hills District, u Manish Kumar, IAS, u Superintendent of Police East Jaiñtia Hills District, u Pankaj Rasgania, IPS, ki heh sorkar na ka tnat P.W.D bad ki heh sorkar kiba na ki tnat bapher bapher.