Ngim ithuh ïa kata ka NPP, ngi ithuh ïa u Dr. Nonglait bad kiew sted ka lyer ha Mawthadraishan

Nongstoiñ , jymmang 28: Wat la ka election MP shiteng samoi na ka bynta ban jied ïa u nongmihkhmat sha ka Ïng Dorbar Thawaiñ Lok Sabha u ban mih bujli ha ka jaka jong u (L) Dr.Ricky A.J.Syngkon ka dang sah sa kumba arbnai tam bad ki kyrtong na ki Seng Saiñpyrthei kim pat lah ban poi sha baroh ki jaka ba ki dei ban leit pynshai ïa ki mat trei kam bad ka thong kaba ki la buh lada ki paitbah ki ai ka jingkyrshan ba pura ban pynjop ïa ki hynrei ki don katto katne ki constituency kiba ka sur na kiba bun ba lang khamtam na ki riew rangbah kiba la kham shem phang ha ka kam saiñ pyrthei ka la sdang ban sawa.
Ha kaba ïadei bad ka Election MP shiteng samoi ka ban sa long kat kum ka jinglum jingtip jong u nongthohkhubor jong u Mawphor na ki riew rangbah jong ki shnong kiba hap hapoh ka Mawthadraishan constituency la lap ba kumba 65 haduh 70% na ki riew rangbah kum ki nonghikai skul, ki nongïalam jong ki kynhun balang Khristan bapher bap her, ki nongsynshar shnong bad ki samla pule kiba la kham sngewthuh shaphang ka Saiñ pyrthei ki la phai khmat sha u Dr.D.R.L. Nonglait u kyrtong ka National Peoples Party.
Haba pyrshang ban kylli na ki samla pule bad ki rangbah kiba la shemphang bha ha ka kam saiñ pyrthei ki la ong ba ka jingnoh mynsiem jong ki sha u Dr.D.R.L Nonglait ka dei namar ba ki la sngewthuh bad ki la tip bha kaei ka kam ram ba ki kyrtong ki dei ban leh lada ki poi sha ka thong ka jingjop.
Nalor kata ki la ong ba ka jingnoh mynsiem ka jong ki sha utei u kyrtong kam dei namar ba ki dei ki nongkyrshan jong ka NPP bad kim ithuh hi ruh ïa ka NPP hynrei ki ithuh ïa u Dr.Nonglait namar ba u dei u nongïalam jong ka Seng ki Nongthohkot Khasi bad u la ïakhun tyngeh ban dawa na ka sorkar ba kan pytrei kam noh ïa ka ktien Khasi ha baroh ki tnad trei kam jong ka sorkar bad lyngba ka jingïalam jong u katei ka jingdawa ka la sei soh mynta.
Kitei ki samla ki la ong ruh ba kum ki samla pule ki don ïa ka thong bad ka jingthmu ba kin pyndep ïa ka jingpule jong ki haduh ki kyrdan kiba ha jrong duh hynrei na ka daw ba ha ki Entrance Exam kum ha ka MPSC, UPSC la pyndon kam tang da ka ktien nongwei ki shem shitom haduh katta katta ban ïaknieh ïa ki samla na kiwei pat ki jaitbynriew kiba ïoh ban toh Exam da ki ktien lajong namar lada duna tang shi marks ruh ka score points ka la hiar.
Ha kajuh ka por ki la ong ba lada u Dr Nonglait un ïoh ïa ka jingjop un ïoh lad ban pynsgew sha ka sorkar pdeng lyngba ka Dorbar Lok Sabha ba kan pynrung noh ïa ka ktien Khasi ha ka Khyrnit ba phra jongka Riti Synshar ka ri lada un jop kim don jingartatien ba ha ka samoi trei kam kaba san snem kum u MP ka sorkar pdeng kan sngap ïa ki mat kiba u dawa ha ka Dorbar Lok Sabha.
Shuh shuh ki la ong ba lada la lah ban pynrung ïa ka ktien Khasi ha ka Khyrnit kaba phra jong ka Riti synshar ka ri ki samla Khasi kiba ïaleh ïa ki Entrance Exam ha ki laiñ bapher bap her ha ka MPSC, UPSC bad kiwei kiwei khlem artatien ki don da ki phew ngut kiba wan shakhmat ki ban ïoh bat ïa ki kyrdan IAS, IPS, IFS bad kiwei kiwei.