Ha Shillong kyntu ka Myntri Khynnah ka sorkar pdeng ban ïakhih paidbah pyrshah ïa ka jingdih drok

Shillong, Jymmang 28 : Ka Myntri Khynnah jong ka sorkar pdeng ba dei peit ïa ka Tnad Youth Affairs & Sports, ka Raksha Khadse ka la kyntu ïa ka rukom treikam kaba ïatyllilang ban ïaleh pyrshah ïa ka jingeh kaba nang kiew jong ka jingdih pynbuaid hapdeng ki samla haba ai jingkren ha ka prokram “Nasha Mukt Yuva for Viksit Bharat – Purvottar” kaba la pynlong da ka MY Bharat hapoh ka Tnad Youth Affairs ha ka Indian Institute of Management (IIM), Shillong.
Ka prokram ka la wanrah lang ïa ki nongmihkhmat na ki 24 tylli ki seng kiba trei ha ki kam kiba ïadei bad ka jingngeit, ki ophisar, ki briew kiba ïadon bynta ha ki kynhun ha ka imlang sahlang bad ki nongïalam jong ki jaka treikam ban ïakren halor ki rukom treikam ban pynkhlain ïa ka jingpynsngewthuh shaphang ki jingma kiba wan na u drok bad ki sienjam ban ïatreilang bad ki samla ha kylleng ka thaiñ Shatei Lammihngi.
Ha kane ka sngi la ïadonlang ka Pallavi Jain Govil, Secretary, Tnad Youth Affairs; Dr. Priyanka Shukla, CEO, MY Bharat; bad ka Prof. Nalini Prava Tripathy, Director, IIM Shillong, bad kiwei kiwei ki kynrem ki lyndan.
Haba ai jingkren ha kane ka jingïalang, ka Raksha Khadse ka la ong ba ka jingbun ki samla jong ka ri India kadei ka bor kaba khraw tam jong ka ri bad ka la ban jur ba ban ïalam ïa ki samla ha ka lynti kaba dei kan long kaba kongsan ban pynurlong ïa ka jingthmu na ka bynta ka Viksit Bharat shuwa u snem 2047.
“Ngi dei ban ïatylli ban rah shakhmat ïa ka Nasha Mukt Abhiyan ha ka mission mode. Ki samla jong ngi kidei ka bor kaba khraw tam jong ka ri, bad kadei ka jingkitkhlieh lang jong ngi ban ïalam ïa ki sha ka lynti kaba dei. Lada ngi ai ïa ki ïa ki jingïalam lynti kiba bha bad ki lad ki lynti, thikna ba ngin poi sha ka thong jong ka Viksit Bharat,” ka la ong.
Haba ban jur ïa ka jingma jong ka jingdih pynbuaid bad ka jingkyrni, ka Myntri ka la ong ba ïa kane ka mat dei ban peit ym tang kum ka jingeh jong uwei pa uwei hynrei kum ka jingeh kaba khraw ha ka imlang sahlang kaba donkam ïa ka jingïatreilang jong ka imlang sahlang bad ka jingïarap ba ïai bteng jong ki jaka treikam.
Haba ïadei bad ka bynta jong ka MY Bharat, ka la ong ba ïa kane ka rynsan la thmu ban pynïasoh ïa ki samla bad ki sienjam ban tei ïa ka ri bad ban pynshlur ïa ki ban ïashim bynta shitrhem ha kaba weng ïa ki jingeh ha ka imlang sahlang ha ki jaka nongkyndong. Ka la kyntu ïa ki Youth Officer bad ki seng kiba ïatreilang ban pynthikna ba ki sienjam jong ka MY Bharat kin poi sha man la ki distrik bad man la ki bynta jong ka imlang sahlang.
Ka Raksha Khadse ka la ban jur ruh ïa ka jingdonkam jong ka jingïalehkai kum ka bor ba wanrah jingkylla ha ka imlang sahlang kaba lah ban pynïasoh bad ki samla bad pynduna ïa ka jingngop ha ka jingdih pynbuaid, ka jingkhuslai bad ka jingshah iehnoh beiñ ha ka imlang sahlang.
“Ka jingïalehkai ka lah ban long kawei na ki atiar ba treikam bha ban ïalam ïa ka bor jong ki samla ha ka lynti kaba bha. Ki jylla ha kylleng ka thain shatei lammihngi, ryngkat bad ka Jharkhand, Bihar, West Bengal, Andhra Pradesh bad Goa, ki la don lypa ïa ka kolshor ïalehkai kaba khlain. Ngi dei ban pynïasoh shuh shuh ïa ki samla bad ki kam ïalehkai, ki kam ba ïadei bad ka kolshor jong ka thaiñ bad ka jingïadei kaba bha bad ka imlang sahlang,” ka la ong.
Ka la ong shuh shuh ba ka jingpynbun ïa ka jingïashim bynta jong ki samla ha ki prokram ba ïadei bad ka kolshor bad ba kynja mynsiem ka ai ka lad ban ïalam ïa ki sha ka jingïadei kaba tei ha ka imlang sahlang bad ka jingdonlang ïa ka jingkitkhlieh.
Haba ai jingkren ha kane ka sngi, ka Prof. Nalini Prava Tripathy, Director, IIM Shillong ka la ong ba ka jinghikai lang ïa ka kam ïalehkai bad ka jingpynïaid ki don ka bynta kaba kongsan ha ka ban saiñdur ïa ki nongshong shnong kiba don ka jingkitkhlieh bad ki nongïalam ha ki por ban wan. Ka la sakhi ba ka jingïalehkai ka ïarap ban pynduna ïa ka jingkhuslai katba ka kyntiew ïa ka jinglong ryntih, ka jingïatreilang hapdeng ki samla.
Ka la bynrap ruh ba ka IIM Shillong ka ïai pynshlur ïa ki samla pule ban ïashim bynta ha ki jingïalehkai, ka yoga, ka jingpyrkhat jylliew, ki kam ba ïadei bad ka kolshor bad ki jingïadei bad ki kam bapher bapher ban pynthikna ïa ka jingkiew ha ka imlang sahlang bad ha ka jingmut jingpyrkhat hapdeng ki samla.
Haba kyntu ïa ki nongïashim bynta ban long ki nongmihkhmat pyrshah ïa ka jingdih pynbuaid, ka Prof. Tripathy ka la pynpaw ïa ka jingshaniah ba ki jingïamir jingmut bad ki jingïakren ha kane ka prokram kin ïarap ha ka rukom kaba don jingmut ban pynkhlain ïa ka jingïakhih jong ka ri pyrshah ïa u drok.
Ha kane ka prokram, la ai ruh ïa ki jingbatai halor ka MY Bharat Portal, ki sienjam jong ki jaka treikam jong ka MY Bharat bad ki rukom treikam ba bha tam ba la shim da ki seng kiba trei ha ka kam ban pyllait na ka jingdih drok bad ka jingai jingtip ïa ki samla.
Ka Raksha Khadse ka la ong ba ki jingïamir jingmut kiba kum kine kiba la pynlong kham mynshwa ha Varanasi ki la wanrah ïa ki jingai jingmut kiba kongsan hapoh ka “Kashi Declaration”, katto katne ki bynta jong kine ki dei kiba dang rah shakhmat da ka Tnad.
Haba ban biang ïa ka jingkut jingmut jong ka Sorkar ban kyrshan ïa ki sienjam ïatreilang pyrshah ïa u drok, ka la pynthikna ïa ki seng kiba ïashim bynta ba ka Tnad Youth Affairs & Sports kan dang ïai bteng ban ïatreilang bad ki jaka treikam, ki seng treimon sngewbha bad ki nongshim bynta ha ka imlang sahlang ban pynkhlain ïa ka jingpynsngewthuh, ki sienjam ai jingai jingtip bad ka jingpyntreikam ha kylleng ka ri. (PIB Shillong)