Pyllait paidbah u Myntri Sorkar Pdeng J.M.Scindia ïa ka Tripura Queen Pineapple Mission ba 236 klur

New Delhi, Jymmang 28 : U Myntri ka sorkar pdeng ba dei peit ïa ka Tnad Development of North Eastern Region (MDoNER), u Jyotiraditya M. Scindia, ryngkat bad u Myntri Rangbah ka jylla Tripura, hynin ka sngi, ki la pyllait paidbah ïa ka “Mission Queen Pineapple”, ka sienjam kaba la ïalam da ka jingïatylli ha ka kam rep sohtrun bad ka jingkyntiew ha ka jylla Tripura kaba T.236 klur. Ïa kane ka Mission la saindur kum ka jingpynkhreh ïa ka jingpyntreikam kaba lai snem naduh ka Q2 jong u snem mang tyngka 2026 haduh ka Q4 jong u snem mang tyngka 2028 na ka bynta ban kyntiew ïa ka Unique Selling Proposition (USP) jong ka Tripura — u Queen Pineapple ba la ïoh jingithuh GI.
La pynskhem da ka MDoNER, ka Mission ka tei halor ka jingïatylli bad ki Skhim bad ki jingïarap jong ki tnad ka rep ka riang & ka bha ka miat jong ki nongrep, Food Processing Industries, Commerce, MSME, APEDA, DPIIT, ICAR, CSIR, TRIFED, NERAMAC bad ka sorkar Tripura na ka bynta ban sdang ïa ka rukom pynïasoh lang ïa ki kam kiba ïadei bad u sohtrun ha ka Jylla.
U Myntri sorkar pdeng ba dei khmih ïa ka Tnad Development of North Eastern Region u la ban jur ïa ka jingthmu jong u Myntri Rangbahduh ka ri u Narendra Modi ban buh ïa ka thain shatei lammihngi kum ka jaka pdeng jong ki mar rep bad ki mar horticulture kiba heh dor.
Haba ai jingkren sha ki nongshim bynta kynthup ïa ki nongrep sohtrun, ki nongshna mar bad ki nongbei tyngka kiba ïadonlang ha kane ka jingïalang lyngba ka bor internet, u Scindia u la ong, “Hapoh ka jingthmu jong u Myntri Rangbahduh ka ri u Narendra Modi, ïa ki bor rep jong ka Tripura la pynkylla sha ki mar ba lah ban pynïaid iew ha kylleng ka pyrthei.”
U Myntri u la ban jur ba ka jingthmu kam dei tang ka jingrep ïa ki jingthung, hynrei ban plie lad ïa ki nongrep ban long ki nongïashim bynta ba shitrhem ha baroh ki kam — naduh ka jingpynmih bad jinglum haduh ka jingpynkhreh, ka jingaipynïaid iew, ka jingsong bad ka jingshalan shabar ri.
Haba ban jur ïa ka rukom treikam kaba kham ïar jong ka Mission, u Scindia u la ong, “Ka thong jong ngi kalong ban tei ïa ka lad kyntiew kam kaba pura—naduh na jaka rep haduh ki ïew kylleng ka pyrthei—khnang ba ki nongrep kin long ki nongïashim bynta ba radbah ha ka jingriewspah ba la wanrah da ki mar rep jong ki.”
U Myntri u la sakhi ba katba u Queen Pineapple jong ka jylla Tripura u don ïa ka jingiwbih kaba kyrpang, ka jinglong kaba duna ka fiber bad ka jinglong ba kyrpang ba la kyrshan da ka GI, ki nongrep ki dang ïai bteng ban ïoh ïa ki dor jong ki mar namar ka jingbym biang ka jingïasoh bad ki iew ki hat bad ka jingbym biang ki jingdon jingem. U la ong ba ka Mission ka thmu ban pyndap ïa kane ka jingduna lyngba ki jingbei tyngka ba la ïalam da ka jingïatylli bad ki jingïarap ba la pynshong nongrim ha ka iew ka hat ki ban kyntiew shibun ïa ka jingkyntiew ïa ka dor kaba ki nongrep ki ïoh.
Haba ban jur ïa ki bynta ba kongsan jong ki jingdon jingem hapoh ka Mission, u Myntri u la ong ba kane ka prokram kan wanrah ïa ka “Hub & Spoke” ka jinglong jingman kaba don ka jingïasoh hadien ba la dep ot ïa u sohtrun kaba kynthup ïa kawei ka jaka pdeng hajan ka kad liengsuiñ Agartala bad phra tylli ki jaka lum ha kylleng ki ki jaka rep sohtrun ba kongsan jong ki distrik West Tripura, Khowai bad Sepahijala. Ki jingdon jingem kin kynthup ïa ki jaka ai kyrdan, ki jaka buh mar ba dait-thah, ka jingpynpoi ïa ki mar rep, ki jaka buh mar ba dait thah da ka solar, ka jingpeit bniah ïa ki jaka rep kaba pyndonkam da ka IoT bad ki rukom wad bniah lyngba ka lad digital.
U Myntri u la ban jur shuh shuh ïa ka jingpynthymmai biang ïa ka Nalkata Pineapple Processing Unit lyngba ka Viability Gap Funding (VGF) model ban pyntreikam da ka NERAMAC ha ka jingïatreilang bad ki kynhun shimet. Kane kan kyrshan ïa ka jingpynkhreh na ka bynta ka kam khaii bad ka jingpynbha ïa ki mar ba la shna na u sohtrun.
Haba kren shaphang ka rukom treikam bio-economy jong ka Mission, u Myntri u la ong ba jan 60 percent jong u sohtrun ba la thung, uba la bret mynta kum kiba lehnohei, yn pynkylla sha ki mar kiba la pynbha lyngba ka jingpynmih Bromelain, ka jingpynkhreh ïa ki Pineapple Leaf Fiber (PALF) bad ki jaka shna jingbam ba ïoh jingithuh GI. U la ban jur ba kine ki jingïarap kin plie ki lad ba thymmai na ka bynta ki SHG ba pynïaid da ki kynthei, ki jaitbynriew riewlum bad ki nongseng kam seng jam ha ki jaka nongkyndong katba kin pynkhlain ïa ka ïoh ka kot kaba wan na ka jingrep sohtrun.
Kum shi bynta ka jingplie paidbah ïa ka prokram, la pyni ïa ka phlim lyngkot halor ka Pineapple Mission, bud sa ki jingïakren bad ki nongrep sohtrun na Tripura bad ki jingkren na ki nongbei tyngka bad ki nongmihkhmat na ki karkhana.
U Myntri Rangbah ka jylla Tripura u Prof.(Dr) Manik Saha u la ong ba ïa u sohtrun la pynbna kum u soh jong ka jylla Tripura. U la ban jur ba ki jait sohtrun ba pawnam jong ka Tripura Queen bad Kew kidei kiba la thung hi ha ki jaka lum jong ka jylla khlem da pyndonkam ïa ki dawai, kaba pynlong ïa ki ban long kiba thiang, kiba shngiam bad ba sma iwbih.
U la ong shuh shuh ba ka Sorkar Jylla ka kyntiew ïa ka jingpynbha, ka jingpynkhreh ïa ki marbam, ka jingsong, ka jingpynïaid iew bad ka jingpynïasoh bad ki iew ki hat ban kyntiew ïa ka kamai kajih jong ki nongrep bad ban plie ki lad ïoh kam ha ki jaka nongkyndong. Haba pynpaw ïa ka jingshaniah ha ka jingkyrshan jong ka Tnad Development of North Eastern Region (MDoNER), u la ong ba kane ka sienjam kan ïarap ban pyndap ïa ki jingduna ha ka jingpynmih bad ban pynskhem ïa u sohtrun jong ka jylla Tripura kum u mar uba ïaid iew ha kylleng ka pyrthei.
U Myntri ka tnad ka rep ka riang jong ka jylla Tripura u Ratan Lal Nath u la kren shaphang ki jingthmu jong ka mission bad ai khublei ïa ka Tnad DoNER na ka bynta kane ka sienjam.
U Sanjay Jaju, Secretary, MDoNER ha ka jingkren jong u u la batai bniah ïa ka rukom pyntreikam jong ka Mission bad u la ban jur ïa ka jingdonkam ban don ka rukom treikam Mission-mode ban plie lad ïa ka ïoh ka kot kaba pura na ka bynta u Queen Pineapple jong ka jylla Tripura. U la ong ba watla kidei napdeng ki jait sohtrun kiba sma iwbih bha bad kiba duna ka fiber ha India, ki nongrep kiba rit ba ria mynta ki ïoh tang T.6-10 shi kilo ha ka kyrdan farmgate, katba ki mar ba la pynkhreh bad shalan shabar ri ki lah ban ïoh ïa ka dor kaba heh ha ki iew hapoh ka ri bad shabar ri.
U Secretary u la ban jur shuh shuh ba ka Mission ka ïaleh ban pynbeit ryntih ïa ki jingduna kiba kongsan ha kane ka kam, kynthup ïa ki jingduhnong hadien ka jingot, ka jingbym don ki jaka buh pyndait-thah ba la pynïasoh lang, ka jingbym don ki jaka pynmih mar kiba heh, ka jingpynïaid iew kaba tlot bad ka jingpynmih pisa na ki mar GI bad ki rukom pynïasoh bad ki nongthied.
Ki kam jong ka Mission kin kynthup ruh ïa ki jingïalang ban ïoh jingithuh GI, ki rukom wad bniah ba pynshong nongrim ha ka QR, ki rukom pynmih pisa na ki mar GI, ki jingïakynduh jong ki nongthied bad ki nongdie, ka jingkyrshan ïa ka jingpynshisha ba kidei ki mar organic, ki sienjam pynkhreh ban shalan mar shabar ri bad ki jingïalang ba kongsan ba man la u snem kum ka “Tripura Queen Pineapple Festival”, kaba ïahap bad ka International Pineapple Day ha ka 27 tarik Jylliew.
Ka Mission ka thmu ban pynkylla ïa u Queen Pineapple jong ka jylla Tripura sha ka mar kaba bha bad kaba ïaid iew ha kylleng ka pyrthei katba ka pynkhlaiñ ïa ki lad kamai kajih kiba ïaineh, ka jingkyntiew ïa ki kam ba la ïalam da ki nongrep bad ka jingkiew shaphang kaba pynshong nongrim ha ka jingshalan shabar ri ha kylleng ka Jylla.
Ha kane ka jingïalang pyllait paidbah la wan ïashim bynta da ki ophisar ka MDoNER bad ka Sorkar Tripura ha ryngkat ki nongrep, ki nongseng kam seng jam bad kito kiba ïadon bynta ha kane ka kam. (PIB)