Nongstoiñ, Jymmang 28: Ka kur Ïawlar na ka shnong Diengsyiang hapoh ka jingïalam u bah Micheal Ïawlar Secretary ka Kur Ïawlar hynriew kpoh baroh kawei, mynta ka sngi ka la leit ban pynsangeh ne khang shuwa shipor ïa ki nongtih shyiap na ka jingtih bad kit shyiap na ka Wah Kynshi kaba don ha Nongkhnum.
Kine ki jaka ki dei ki katto katne ki jaka kiba dang hap hapoh ka shnong Diengsyiang kawei na ki shnong ha ka thaiñ Nongkhnum, Nongstoiñ West Khasi Hills District, da kaba ki la kynnoh ruh ba ka daw ka long halor ka nongrim ba lah sniew lut baroh kawei ka surok ha shilynter naduh ka shnong Nongjyllieh ter ter haduh ka madan Ñiamlang ka jaka ba ju pynïeng ki kali ki nongwan jngoh kai pyrthei.
Ïa katei ka rai la shim hadien ka jingïalang kur paidbah ïa kaba la ïoh ban pynlong ha ka shnong Diengsyiang. Ka kur ka la khang ruh ïa ka khyrdop lum pisa ïa ki nongleit jngohkai sha katei ka thaiñ. La ong ruh ba ïa mynta kan ym don shuh ka jinglum pisa ha katei ka khyrdop, namar la khang tad haduh ynda la pynbeit biang sa da kumwei.
Ka kur ryngkat ka jingïadonlang ki longkmie, ki rangbah bad ki samla kumjuh ruh u bah Banteiborlang Marweiñ shongknor ka Hala Tynrai Eco Tourism Co operative Society Ltd Nongstoiñ, ki la pynpaw ïa ka jingbynñiaw namar ka jingsniew ka surok bad ki la ong ba ka jingsniew palat ka surok ka la ktah ïa ka kam jngohkai pyrthei.
Kumta, da kawei ka sur ka kur ka la mana ban tih shyiap bad ka la pynbna ruh ba yn pyllait ei shipor ïa ka bai rung na ka bynta ki nongleit jngohkai pyrthei kiba ïaid lyngba ka shnong Diengsyiang.
Haba ïadei bad katei ka phang ka Kur ka la leit ruh ban ai jingthoh sha ki nongshimwai ïa ka Parking bad ïa ki nongtih Shyiap na katei ka thaiñ. Ha kajuh ka por ka kur ka la leit ruh ban ai jingthoh sha ka Smt Hema Nayak (IAS) Deputy Commissioner ka West Khasi Hills District halor kane ka bynta.
