SHILLONG, Jymmang 28: Ka Myntri Khynnah jong ka Sorkar Pdeng ba dei peit ïa ka Tnad Sports & Youth Affairs, ka Raksha Khadse, hynne ka sngi Palei ka la leit jngoh ïa ka Sports Authority of India (SAI) North Eastern Hill University (NEHU) Centre kaba don ha Shillong, ha kaba ka la ïoh ban ïakren bad ki nongïalehkai, ki coach bad ki ophisar ha katei ka jaka.
Ha kane ka sngi ka Raksha Khadse ka la ïoh ban jngoh ïa ki jaka ïalehkai bapher bapher bad peit bñiah ïa ki kam ai jinghikai kiba dang ïaid shakhmat kiba la sdang na ka bynta ki nongïalehkai ha kylleng ki jait jingïalehkai.
Ha ka jingïakren bad ki nongïalehkai bad ki coach, ka la pynshlur ïa ki ban bteng ban pyrshang ban ïoh ïa ka jingtbit bad ka jinglong ba ryntih, ka jingkut jingmut bad ka jingaiti lut.
Ha kajuh ka por kane ka Myntri ka la ïashim bynta shitrhem ha ki jingïalehkai kynthup ïa ka jingsiat khnam bad ka jingïalehkai phutbol bad ki nongïalehkai ha kane ka jaka, da kaba ban jur ïa ka jingdonkam jong ka jingïashim bynta ha ki kam ïalehkai bad ka jingiatreilang ha ki jaka nongkyndong.
Ka Raksha Khadse ka la ban jur ba ka jingïalehkai ka don ka bynta kaba wanrah jingkylla ha kaba saindur ïa ki samla kiba skhem jingmut, kiba long ryntih bad kiba ïaineh ha ka kam katba ka long ruh kum ka lad kaba khlaiñ na ka bynta ka roi ka par ha ka imlang sahlang bad ka jingkiew shaphrang jong ka ri.
“Ka thaiñ shatei lammihngi ka don kyrhai ki riewdonsap ha ka Sports bad ka kolshor kaba khlaiñ ha ka jingïashim bynta ha ka kam ïalehkai. Ka long kaba kongsan ba ngin ïai bteng ban pynkhlaiñ ïa ki jingdon jingem, ka jingkyrshan ïa ki nongai jinghikai bad ki lad ban kyntiew ïa ki nongïalehkai khnang ba kin kham bun ki samla na ka thaiñ kin lah ban paw ha ki kyrdan ïalehkai ha ka ri bad shabar ri,” ka la ong.
Haba ban jur ïa ki jingmyntoi ba kyrpang jong ka SAI NEHU Shillong centre, ka Raksha Khadse ka la ong, “Kane ka centre ka don ka lad kaba khraw ban ai jinghikai ïa ki nongïalehkai kiba don ha ka kyrdan ba halor tam namar ka jingitynnad jong ka mariang, ka jinglong jai jai bad ka jinglong ka suiñbneng kaba sngewtynnad. Lyngba ka jingïai bteng ban kyntiew bad kyrshan, ka SAI NEHU Shillong ka lah ban long ka jaka ai jinghikai kaba kongsan na ka bynta ki nongïalehkai kiba pynkhreh ia ki jingïalehkai ha ka ri bad kylleng ka pyrthei”.
Shuh shuh ka la pynpaw ba ki jingïalehkai ym tang ba ka ïarap ïa ka koit ka khiah ha ka met hynrei ka nohsynniang ruh shibun ha kaba tei ïa ki jinglong nongïalam, ka jingïatreilang bad ka jingïadei kaba bha ha ka imlang sahlang hapdeng ki samla.
Kiba ïadon bynta lang ha kane ka jingleit jngoh ki long u Rajnish Mishra, Assistant Director, Sports Authority of India; Bah John Kharshing, Working President ka Meghalaya Olympic Association; ryngkat bad kiwei pat ki ophisar, ki coach bad ki nongtrei.
Kane ka jingleit jngoh ka long shi bynta jong ki sienjam ba ïai bteng jong ka Tnad ban pynkhlaiñ ïa ki jingdon jingem ba ïadei bad ka kam ïalehkai, ki rukom kyrshan ïa ki nongïalehkai bad ka jingkyntiew ïa ki kam ïalehkai ha ki jaka nongkyndong ha kylleng ka thaiñ Shatei Lammihngi.
