Pynim bad khyllie biang ka kam jngohkai ïa ka pliang ja ki Nong Sohra : Bah Gavin Mylliem

Shillong, Jymmang 25 : Ka jingkhangtih deiwong ha u 2014 ka la ktah jur bha ïa ka ïoh ka kot ha Sohra khamtam ka Shnong Laitryngew bad Mawkma kiba shaniah tylli ha ka kam tih dewiong kiba duh ïa ka kamai jakpoh, ong u MLA ka NPP na Sohra u Bah Gavin Mylliem ha ka Lah Sngi U Blei. Ula bynrap ba ka kam jngohkai ka la mih pat kum ka nongwanrah ïa ka ïoh ka kot ha ka thaiñ ban pynim bad khyllie biang ïa ka pliang ja jong ki paid ka thaiñ.
“Hooid, ngim lah ban len ïa ka jingshisha ba ha kine ki bun snem ba la leit naduh ka khang tih dewiong ha u 2014, ngi don ki jaka kum ka Laitryngew, Mawkma ha kito ki snem shuwa u 2014, bun na ki briew ki shaniah ha u dewiong na ka bynta ka ïoh ka kot jong ngi” ong u bah Gavin haba ïakren bad ki nongthoh khubor.
Une u MLA ka Sohra ula ong ba kane ka jingkhang tih dewiong kala pynbor ïa ki nongshong shnong ban wad da kiwei pat ki lad kamai, bad ka kam jngohkai ka la weng suki suki ïa ka jingeh.
“Hynrei hadien ka jingkhang tih dewiong, phim lah ban len ïa ka jingshisha ba ki kam jngohkai ki la ïarap shisha ban kyntiew ïa ka kamai kajih jong ki briew ha ka thaiñ” ula ong.
U Bah Gavin ula pynpaw ba ka jingkhring ka Sohra ka la paw ym tang ïa ki nongwankai na la ïing. “Ka Sohra ka la lah ban khring ïa ki nongshangkai ym tang napoh ka Ri hynrei wat ki nongshangkai na kylleng ki ri ka pyrthei” ula ong.
Ula ainam ïa ka jingïashim bynta ki Shnong ki thaw ha ki project ba kyrshan ka Sorkar halor kane ka jingkylla. “Baroh ki Shnong ki la ai ïa ki kti sha ka Sorkar bad khamtam bad kine ki project kiba hap hapoh ka PM-Devine, World Bank, skhim ADB” ula ong.
“Namar kane, ngi sngewthuh ba ki briew na ka thaiñ bad ki shnong ki thaw ki la sngewthuh ba kane ka kam jngohkai ka la synniang shikatdei eh sha ka ïoh ka kot jong ka thaiñ” ula bynrap.
Watla ka kam jngohkai ka la kiew, u Mylliem u la phla ba ka Sorkar ka lah ban leh duna eh ha ban pynneh ïa ka dor kaba jem jong ki jaka sah ki riew shimet haba kiew ka jingdawa.
“Kata ka dei ka jingkylli kaba eh namar ban pynbeit ïa ka dor haba phai sha ki jaka sah ki riew shimet, ka long kaba eh bha na ka bynta ka Sorkar ban pynbeit,” u la ong haba la kylli shaphang ka jingpynbeit ïa ka dor sah.
U la ong ba ki jaka sah kiba rem dor ha Sohra ki dang duna. “Mynta nga pyrkhat tang ka Jiva, Polo Orchid ki ai ïa ki jaka sah kiba rem dor kumta hooid ngin sa peit aiu ka Sorkar ka don ha ki sngi ban wan ban pynthikna ba ka jaka sah kaba jem dor lah ban ai sha ki briew,” u la bynrap.