Namar ka jingkynduh jingeh ki nongtrei dewïong, yn shong shah thngan ka JCOMSWA ha Khliehriat

Khliehriat jymmang 25: Ha kaba ïadei bad ka jingeh kaba mih na ka daw ka jingshah khang ban tih bad shalan dewïong ka seng Jaiñtia Coal Owners, Miners, Suppliers and Workers Association(JCOMSWA) hapoh ka jingialam u President, u bah Marshal. S.B.Biam bad u General Secretary, u bah khrawbor Ryngkhlem kan pynlong ïa ka jingiakhih da kaba shong shah thngan ha trai u mot jong u Kiang Nangbah ha Khliehriat East Jaiñtia Hills District bad kane ka jingshong shah thngan kan sdang naduh ka 1 tarik u bnai jylliew 2026.
Na ka liang u President ka JCOMSWA, u la pynpaw ba kane ka jingiakhih da kaba shong shah thngan ka dei na ka daw ban pynbor ïa ka sorkar bad ki tnat ba dei peit ba kin shimkhia kloi ha kaba ïadei bad ki jingeh ba ki paidbah ki iakynduh na ka daw ka shah khanglad ban tih bad shalan dewïong, namar naduh u snem 2014 ba la khanglad da ka National Green Tribunal ban thih bad ban shalan dewiong ki paidbah jong ka East Jaiñtia Hills District ki la iakynduh jingeh haduh katta katta bad ki paidbah ki la shah ktah ha ka ioh ka kot bad ktah ruh ïa ki longiing longsem kiba im ja kpoh da ka trei dewïong, kiba shah ktah ki kynthup naduh ki trai dewïong, ki nongtih dewiong, ki nong die ne supplier dewïong bad baroh kiba im da ka kam dewïong.
U bah Marshal Biam, u la ong ba kane kan dei ka jingiakhih kaba jai jai ka ban nym ktah ïa ka suk ka saiñ hapoh ka district bad ruh halor kane na ka liang ki bor district jong ka East Jaiñtia Hills District ruh ki la ai jingbit ïa ka JCOMSWA ban pynlong ïa kane ka jingiashong shah thngan.