Shillong, Naitung 18 : Ka Wahlyngkhat SC ka la pynliem da 2-1 kol pyrshah ïa ka Pyrdiwah SC ha ka lympung Riwar Mihngi Football League ba la tip kum ka Olim Singh Syiem Memorial Trophy 2022 ba la pynïaid da ka Riwar Mihngi Social Welfare and Sport Association (RMSW&SA) kaba dei kawei na ki Association ba la rim.
Ha ka jingïalehkai ha ka sngi Saitjaiñ jong ka taïew ba lah dep ka Wahlyngkhat SC ka la ïoh ban pynkhih jar ha ka minit ba hynñiew lyngba u Ronaldo Khongshun Jersey bad haduh ka kylla step ka Wahlyngkhat SC ka la lamkhmat da 1-0.
Haba ka kylla miet ka Pyrdiwah SC kala pyrshang dohïap ban ïoh pynïakhaid hynrei kam ïohlad satia bad ha ka minit kaba 59 jong ka kylla miet ka Wahlyngkhat SC kala ïoh biang ban pynkhih ïa ka jar lyngba u Banrap Khongbuh. Ka Pyrdiwah SC kam shem la duh mynsiem ka ïai ïakhun dohïap beit bad dei ha ka minit kaba 70 ka la ïoh ban pynphai kylla shi kol lyngba U Riven Hang Jersey. Hynrei namar ba ka por ka la poi noh sha kaba kut ka Wahlyngkhat SC ka la pynliem syndon da 2-1 kol.
