Naduh ba la kiew dor ka petrol, kynjah jar jar ka Ïewduh, hap shu shongkai kiba die jingdie ba hiar ka ïew ka hat

Shillong Jymmang 24: Ka jinghiar palat jong ka ïoh ka kot bad kumjuh ruh ka jingbym biang shuh ka bylla ka Sngi ha kine ki por kiba mynta ka la ktah bha ïa ka ïoh ka kot jong ki paidbah nongshong shnong jong ka jylla Meghalaya hi baroh kawei.
Ïa kane la ïohi ba katba nang mih ki Sngi ka ïew ka hat ka die ka thied jong ki paidbah ka la nang hiar nang hiar ha kaba la ïohi ba ha kine ki Sngi ki jaka ïew bad ki jaka die ne ïathied ki la kynjah bha bad duna ruh ka jingdie jingthied.
Halor kane haba ïoh ban jurip ïa kawei na ki Ïew kaba heh tam hangne ha ri Khasi Jaiñtia ne ka jylla Meghalaya hi baroh kawei, ka Ïewduh la ïohi ba ka la long kaba kylluid bad kaba la kynjah bha bad duna bha ruh kiba wan ban thied ban pet ha kane ka Ïewduh.
Haba ïoh ban ïaid sawdong jong kane ka ïew la ïohi ba jan baroh kiba die jingdie ki la shu ïa shong kai bad don ruh kiba shu hap pynlut kai ïa ka por ban ïalehkai ïa ki mobile phone jong ki tang ban pynmyllen bad pynbyrnia bad pynlut noh ïa ka por naba kynjah palat ka ïew ïadie ïathied.
Haba ïoh ban ïakren bad katto katne ngut kiba die jingdie ki la ud ba ka jinglong jingman jong ka ïew ka hat ha kine ki Sngi ka la long kaba isangsot bha naba manla ka Sngi haba ki wan ban phriang ïa ki mar ki mata bad ban plie ïa ki dukan kin dang ïoh ban bhohni haduh da lah jan dei ka por khang bad ruh ki Sngi ba ym don jingdie eiei bad hap leit phai thylli sha la ki Ïing ki sem jong ki.
Hynrei ki la pynpaw pat ïa ka jingbym lah ban leh eiei naba ka kam shong dukan ne kam khaïi jong ki kadei kaba ki la leh lah bun bun snem ym don jaka ba kin trei pat da kawei ka kam bylla.
Lah ban ong ba naduh ba la thnem bha ka ïew ïadie ïathied online ka ïew badei hok bad kaba la trei shitom da la ka met ka phad bad ka umsyep ka la nang troiñ bad la nang hiar dor katba nang mih ki Sngi, katba kiwei pat ki kam kiba heh kum ki company ne ki karkhana na shabar jylla ki la nang ïoh lad ban bsuh bad pyndonkam lut ïa la ki jong ki buit ki bor treikam ban ïoh rung sha kine ki lum Khasi Jaiñtia ban leh ïa ki kam khaïi pateng bapher bapher, la ka dei ïa ki kam tih mawshun, tih dewïong beaiñ bad kiwei kiwei pat ki jaitkam ban kjit lut ïa ka spah ka phew, khamtam eh ka spah mariang na kane ka jylla Meghalaya.
Katba ki paidbah nongshong shnong jong ka jylla Meghalaya kiba dei ki trai jylla ki la nang ringsdot nang ringswai katba dang ïaid ki por bad ha manla ki jaka bad kim lah shuh ban pyrkhat ba kumno kin dang lah ban pyndap ïa la ki jong ki ïing ki sem bad ban bsa bam ïa la ki khun ki kti.