Shillong, Jymmang 24: Ka Kerala ka la wanphai na ka shi kol ban pynliem noh ïa ka Meghalaya da 2-1 kol ha ka jingïakhun Quarterfinal jong ka Swami Vivekananda U-20 Men’s National Football Championship 2026 kaba la long ha ka step sngi Saitjaiñ ha Narainpur, Chhattisgarh.
U Mebanlamlynti Masharing u la pynkhihjar tang hapoh 20 minit na ka bynta ka Meghalaya hynrei ka Kerala ka la ïakhun tyngeh ban wanphai da kaba thep ar tylli ki kol lyngba u Sheril Thomas (26’), Calwin Thomas (44′).
Namar kane ka resol, ka Meghalaya kam shym la lah satia ban pynurlong biang ïa ka jingjop pyrshah ïa ka Kerala kumba ka la leh ha ka U-20 Men’s NFC ha u snem ba la dep, ïa kaba ka jylla ka la jop da 2-1.
Watla ka long ka jingduh mynsiem ïa ki khynnah ïalehkai ka Meghalaya, kiba la don ha Chhattisgarh naduh ka taïew ba nyngkong jong u bnai Jymmang, hynrei ki la lah ban ïalehkai bha da kaba jop ïa baroh saw tylli ki jingïalehkai ha ka Group A, pyrshah ïa ka Bihar da 3-1 ha ka 09 tarik Jymmang, da 5-0 pyrshah ïa ka Jharkhand ha ka 11 tarik Jymmang, da 8-1 kol pyrshah ïa ka Andhra Pradesh ha ka 13 tarik Jymmang bad da 3-0 kol ïa ka Rajasthan ha ka 17 tarik Jymmang.
