Kynthuplang ka Meghalaya 18 tarik u Jylliew ka elekshon MP Rajya Sabha ha ki 10 Jylla

Shillong, Jymmang 23 : Ka Election Commission of India hynin ka sngi ka la pynbna ba ka elekshon kaba shisien arsnem ban jied ïa ki 24 ngut ki MP ba thymmai sha Rajya Sabha ha ki 10 tylli ki jylla kynthup lang ïa ka Meghalaya kan long ha ka 18tarik Jylliew mynta u snem.
Katkum ka jingpynbna, ka jingthep vote bad ka jingñiew vote kan long ha katei kajuh ka sngi.
Ka jingpynlong ïa kane ka elekshon kadei hadien ba ka samoi treikam jong ki 24 ngut ki MP kan sa kut noh ha u Jylliew – Naitung 2026.
Na ka Commission ka la pyntip ba ka jingpynbna na ka bynta kane ka elekshon yn sa pynmih ha ka 01tarik Jylliew kaba dei ruh ka sngi sdang jong ka jingthep kyrteng.
La pynbna ba ki kyrtong ki lah ban thep kyrteng haduh ka 08tarik Jylliew ha kaba ka jingbishar ïa ki kot ki sla kan long ha ka sngi kaba bud, kata ha ka 09tarik Jylliew. Bad ka tarik ba khatduh ban weng kyrteng kan long ha ka 11tarik Jylliew.
Ïa ka jingthep vote la buh ban pynlong hapdeng ka por 9:00 baje mynstep haduh 4:00 baje janmiet jong ka 18tarik Jylliew bad ka jingñiew ïa ki vote pat kan sdang ha ka por 5:00 baje jong katei kajuh ka sngi.
La pyntip ba baroh kane ka elekshon dei ban pyndpe lut hapoh ka 20tarik, bynrap shuh shuh ka ECI ha ka kyrwoh ba la soi da u Secretary Suman Kumar Das.