Ka jingpynbeit pud Assam bad Meghalaya ka don ha kti ki ar Myntri Rangbah: Timothy D Shira

Shillong, Jymmang 23 : Ka jingïa kren pynbeit pud hapdeng ka Assam bad ka Meghalaya ha kaba kut kan shong ha ki arngut ki Myntri Rangbah jong ki ar jylla, ong u Myntri ka tnad Tourism ka sorkar jylla, u Timothy D Shira.
Haba kren bad ki lad pathai khubor u Myntri u la ong ruh katto katne na ki jingeh kiba mih ka dei ruh na ka jingïapher hapdeng ki paidbah ba sah ha ki jaka khappud.
“Ngam tip kaei ka daw ba ki briew kiba sah ha khappud jong ka Assam bad Meghalaya, ki don beit ki jingïakynad bad ka jingïakam mar kylliang.”
Da kaba pynjngai ïalade na ka jingïakren kaba dang ïaid shakhmat, u Myntri u la ong, “Kata kan shong ha ka rai jong baroh arngut ki Myntri Rangbah jong ki ar tylli ki jylla. Ngam don ei ei ban ong halor kane namar ngam don bynta kum u dkhot ha ka komiti khappud. Ngam tip ei ei shaphang kane.”
U Myntri u la pynpaw ba ka don ka jingïapher ïa ka jinglong jingman bad la ka jong ka constituency kaba don khappud bad ka Assam.
“Nga ruh nga dei na ka thain khappud bad ka Assam, ha ka thain jong ngi kam don kano kano ka jingïakajia”, u la ong. “Ki briew na ka liang ka Assam, ki wan bad ki briew ki im ha ka jingsngew shipara bad kam don jingïapher.”
U la ïathuh ruh ba ka jingrep sha shilliang pud ka dei ka ka kam kaba la slem bha hangtei. “Kham bunsien ki briew kiba sah ha Meghalaya, ki rep ha ki jaka ba dei jong ka Assam. Ngi siew khajna naduh ki por phareng”, la ong u Shira.
Haba kylli hato kane kajuh ka rukom ka lah ban treikam ha ki jaka ba don ki jingïakynad kum ka Lapangap, u la ong ba ka mon ka dei ha ka imlang sahlang.
“Ka shong ha ka jingsngew jong ki paidbah, lada ki lah ban ïatreilang iwei ïa iwei pat, lada ki lah ban pynlong ïa ka jingïadei kaba bha, ka long kaei kaei kaba pher bak-ly-bak, lehse ka don kano kano ka daw balei ba ka don beit ka jingïakynad hangtei”, u la ong.