La donkam ban saiñdur ïa ki samla ha kane ka kynti kaba mynta : Principal Secretary

Shillong, Jymmang 23: Ka National Institute of Fashion Technology, Shillong mynta ka sngi ka la pynlong ïa ka Graduation Show 2026 jong ka ha kaba la rakhe ïa ki jingjop ha ka jingpule, ka jingsaiñdur bad ki jingjop ha ki kam, jong ki samla kiba la pyndep ïa ki jingpule bapher bapher.
Ka Graduation Show ka long kum ka rynsan kaba heh kaba pyni ïa ki jingmih na ki snem jong ka jingpule, ka jingwad ïa ka kam saiñdur bad ki sienjam kiba ïadei bad ka kam ba la shim da ki samla kiba la pyndep ïa ka jingpule ha NIFT Shillong. Kane ka prokram ka pyni ïa ki jingshem bapher bapher, ki rukom saiñdur bad ka jingsngewthuh ïa ka kam kaba ki samla ki la ïoh lyngba ka graduation projek kaba 16 taïew bad ruh ki jingïatreilang bad ki kynhun bapher bapher ha kylleng ka India.
Ha ka jingai jingkren ha kane ka sngi, u Frederick Roy Kharkongor, Principal Secretary, ka tnat Textiles jong ka Sorkar Meghalaya, u la ban jur halor ka jingdonkam ban kyntiew ïa ka sap saiñdur bad ban pynkhlaiñ ïa ka jingïatreilang jong ka kam pule puthi, ki karkhana bad ka roi ka par ha ka thaiñ lyngba ka jingsaiñdur thymmai bad ka jingseng kam lajong. U la ïaroh ïa ka jingïakhleh lang ka jingshna ïa ki mar, ka kolshor bad ka dustur kaba la paw ha kane ka prokram bad u la ong ba u hun ban ïohi ïa ka jingkiew ka jingïatreilang jong ka Sorkar Meghalaya bad ka National Institute of Fashion Technology hapoh ka jingïalam jong u Dr. Brijesh Deore.
Ka Prof. Nalini Prava Tripath, Director, IIM Shillong ka la kdew sha ka jingdonkam jong ka jingïatreilang jong ki kam bapher bapher, ka jingsaiñdur thymmai, ka jingseng kam lajong bad ka jinglong nongïalam ban tei ïa ka lawei jong ki nongsaiñdur ha ki por ban wan.
U Campus Director jong ka NIFT Shillong, Dr. Brijesh Deore u la ong ba ka Graduation Show ka pyni ïa ka jingkut jingmut jong kane ka jaka pule ban don ka jingtbit ha ka kam pule puthi, ka jingsaiñdur thymmai bad ka jingïoh jinghikai kaba ïahap bad ka kam, bad u la kitbok kit rwiang ruh ïa ki samla kiba la pyndep ïa ka jingpule jong ki.
Ha ka jingpyni ïa ka rukom saiñdur ba bun bynta kaba la ai jinghikai ha NIFT Shillong, ki tnat bapher bapher ki la pyni ïa ki projek jong ki kiba long ka dak jong ka jingsaiñdur, ka jingwad bniah, ka jingïaineh, ka jingshna ïa ki mar bad ka jingïadei bad ka kam ha ki bynta bapher bapher jong ka riam ka beit bad ka jingsaindur.
Ka tnat Fashion Communication ka la wanrah ia ka Graduation Show 2026 jong ka hapoh ka phang’Communique’, kaba pyni ia ka jingkylla ka kam saindur, ka kam ïathuh khana bad ka jingai ki khubor lyngba ki dur ha ka imlang sahlang mynta. Haduh 23 ngut ki samla pule ki la pyni ia ki projek jong ki.
Ka tnat Fashion & Lifestyle Accessory Design ka la rakhe ïa ka jingjop jong 20 ngut ki samla kiba la pyndep ïa ka jingpule ha ki jingpyntbit bapher bapher ha ka jingïatreilang bad ki kynhun bapher bapher na kylleng ka India.
Ka tnatTextile Design ka la pyni ia ki kam jong 25 ngut ki samla ba la pyndep ia ka jingpule kiba la pyndep ia ki graduation projek bad ki kompani bad ki kynhun saindur bapher bapher, ha kaba la pyni ia ka jingsaindur thymmai, ka jingiaineh bad ki kam kiba iadei bad ki jainkatkum ka juk mynta.
Ka tnat Fashion Management Studies ka la rakhe ia ka jingpyndep ia ka Master of Fashion Management programme da 22 ngut ki samla. Ki projek jong ki ki la dei ha ka Fashion Retail and Merchandising, Brand Management and Marketing, E-commerce and Digital Strategy, Supply Chain and Operations, bad Sourcing and Product Development.
Ka tnat Fashion Design ka la pyni ia ki kam jong 30 ngut ki samla kiba la pyndep ïa ka jingpule ba kynthup ia 6 tylli ki thup saiñdur bad 24 tylli ki Graduation Projects. Kine ki thup jong ki riam ki la pyni ïa ka jingsaiñdur, ka jingshna mar, ka jingitynnad katkum ka juk mynta bad ka jingïahap bad ki karkhana. Ki samla ba la pyndep ïa ka jingpule ki la ïoh ruh ïa ki kam bad ki projek bad ki kynhun kiba heh kiba ïadei bad ka riam ka beit bad ruh ki nongsaiñdur kiba la pawnam bha.
Ki nonghikai bad ki khynnah na ka Hill View Secondary School bad Seven Set Secondary School ki la wan iashim bynta lang ha ka Graduation Show 2026 kum shi bynta ka sienjam jong ka National Institute of Fashion Technology’ ban kyntiew ia ka jingtip shaphang ka jingpule shaphang ka jingsaiñdur bad ki kam kiba lah ban ïoh na kane. Ki khynnah ki la ïakren ruh bad u Campus Director, ki nonghikai bad ki samla pule na ka NIFT Shillong.
Ha kane ka prokram, ka la don ka jingïashim bynta da kito kiba don bynta ha kane ka kam, ki riewshemphang, ki briew kiba la pyndep ïa ka jingpule jong ki na ka NIFT Shillong bad ruh ki nongshah khot sngewbha, ha ka jingrakhe ïa ka jingsaiñdur bad ka jinglong nongïalam ka thaiñ shatei lammihngi ha ki kam kiba ïadei bad ka riam ka beit.