Lada ngin pdiang ïa ka election kumba kwah ka KHADC, ka riti dustur ka la ïap: Khongshei

SHILLONG, Jymmang 22: Napdeng ki 12 ngut ki sordar kiba don hapoh ka Dorbar Raid jong ka Khatarshnong, 11 ngut kila kyntait ban ym pdiang ïa ka jingthmu jong ka KHADC ban pynlong ban jied ïa u Syiem ba thymmai jong ka Hima Sohra.
Mynta ka sngi kine ki sordar kila wan ban kynduh ïa u Executive Committee u Bah Denzil Chen uba bat ïa ka tnad Elaka ban ïa kren halor ka kam ban ai Sanad ïa u Marremdor uba la shah jied ha ka Dorbar bad tang u Sordar ka Raid Mawmang u khlem wan ha kane ka sngi.
Haba kren ha ki lad pathai khubor hadien ba la dep ban kynduh ïa u EM, u Bah Kyntiew Khongshei uba dei u Secretary jong ka Raid Mawshuit u la ong, “Ka jingkyntait ka jong ngi ban pynlong ïa ka election ka long namar ba ka riti dustur kaba la ju bud ryntih naduh u men barim kan ïap noh”.
“Lada ka KHADC kan pynïaleh election kaba mut ka riti ka jong ngi kan ïap noh ne kdiah, namar kumba long une u P Syiem haba u wan ban ïeng Syiem katkum ka riti dustur ka long ba tang u Syiem ne kiba shong hapoh ka Hima Sohra ki lah ban ïakhun Syiem” ong u Bah Khongshei.
Shuh shuh u la ong, “Ban pynlong election ka long ba tang lada ka don ka jinghuri hura ka jingbym ïa beit jingbym sngewthuh jingmut ha ka kur jong ki lah ban pynïaleh election, hynrei mynta ym don eiei ka jinghuri hura ha ka ïing ka sem jong ki bad ki long kiba iaid beit ïaid ryntih…..te ngin ïaleh election pat ïa kaei kein la buh dak jingkylli u Bah Khongshei namar ba une u P Syiem ruh u khlem shong khlem sah shuh hapoh ka Hima Sohra”.
U Bah Khongshei u la ong ba ha ka jingiakynduh ïa u EM kila kyrpad ïa u ban ai noh ka Sanad sha u Marremdor, hynrei u la iathuh ba ka Executive Committee kala rai ban pyniaid beit sha khmat da ka election.
Halor kane ka kynrum kynram, u Bah Khongshei u la pynpaw ba baeoh ki 11 ngut ki sordar kiba la wan kila kyrpad bad ai jingmut ïa u Bah Denzil ba u dei ban long ïa kito baroh ki khliennongsynshar kiba hap hapoh ka Hima Sohra ba un lum da ka dorbar khnang ban gin ioh ïakren markhat ban lap kiei kita kiba dei hok ban leh ïa ka riti dustur la kidei kita kiba wan ujor ha u ne ngi kum ka Raid Mawshuit 12 shnong, hynrei ban shu kam na jrong khlem ki sakhi satar ka long ka bym lah ban pdiang.
Halor kane u EM u la ong ba kin sa ïa pynbeit namar ba um lah ban shim rai hynrei u la ong ba yn sa rai da ka Executive Committee la ka EC ka sngewdei dei ban khot ïa kata ban kynduh lang ki khlieh nongsynshar bad hangta ngin sngewthuh ym ban shu pynksan lajong lajong bad lada u lum ngin sa tip uei uba dei hok shisha, u la iathuh.
“Halor ka rai election, ngin ym lah tang mangi ban kren eiei hangne namar ba ngi hap ban rah sha ka Dorbar ban ïa rai lang baroh” ong u Bah Khongshei.