Old Trafford-Manchester, Jymmang 23: Ka Manchester United ka la pynthikna ïa ka jingthung kam ïa u Michael Carrick kum u coach ba pura jong ka klob ha ka jingïateh kontrak kaba ar snem.
U Carrick, 44 snem ka rta, u la shimti kum u coach ba shipor hadien ba u Ruben Amorim u la shah weng kam ha u bnai Kyllalyngkot bad u la lah ban ïalam ïa ka kynhun ban ïoh rung sha ka Champions League da ka rukom ïalehkai kaba kyrpang.
U Carrick, u coach barim jong ka Middlesbrough, u la pynthikna ïa ka United ba kan pyndep ha ka kyrdan kaba lai ha ka Premier League, hadien ba ka la jop ïa ka Nottingham Forest ha ka sngi U Blei.
U la jop 11 na ki 16 tylli ki jingïalehkai kum u nongpynïaid bad u la shah jied ha ka thup jong ki 6 ngut ban ïoh ïa ka khusnam Premier League’s Manager of the Season.
Ym don kano kano ka klob kaba la kamai bun point ban ïa ki 36 poiñ kiba ka United ka la ïoh ban khur naduh ba u Carrick u la shah thung ban shimti ïa ka kam ha ka 13 tarik u Kyllalyngkot.
Hadien ka ai jingmut jong u Jason Wilcox, Director ka phutbol jong kane ka klob, bad u Executive u Omar Berrada, u Jim Ratcliffe bad ka ïing ka sem jong ka Glazer ki la ai ïa ka jingmynjur ban pyndep ïa ka jingthung kam ïa u Carrick.
“Naduh ka khyllipmat ba nga la poi hangne 20 snem mynshwa, nga la sngew ïa ka bor jadu jong ka Manchester United. Ka jingkitkhlieh ban ïalam ïa ka klob phutbol ba kyrpang jong ngi ka pyndap ïa nga da ka jingsarong kaba khraw,” la ong u Carrick.
“Ha kine ki san bnai ba la dep, kane ka kynhun ka la pyni ba ki lah ban poi sha ki kyrdan ban ïakhun pyrshah, ka jingïatylli bad ka jingkut jingmut kaba ngi dawa hangne.”
