Ryngkat bad ki samla pule yn ïatrei lang ka DREAM ban rat dyngkong ïa u drok ha nongbah Shillong

Shillong, Jymmang 22 : Ka Drug Reduction, Elimination & Action Mission (DREAM) ka shaniah tylli ha ka bor jong ki samla pule ban ïakhun pyrshah ïa u droks bad mynta ka sngi 33 ngut ki samla pule ka William Carey University ki la lamkhmat ha ka jingïalang pynsngewthuh paidbah pyrshah ïa u droks lyngba ki drama lyngkot, ki jingrwai bad ki jingshad.
ïa kane ka jingïalap pyrshah droks ba la pynïaid ha ryngkat ka jingïatreilang bad ka Bosco Integrated Development Society (BIDS), la pynlong ha ki thaiñ Police Bazaar, ïew Mawlong hashuwa ban pynkut ha Nongmensong.
Ka DREAM ka ong ba mynta ka dang pynïar ïa ka prokram internship jong ki samla pule, bad ka la buh ïa ka kum ka bynta kaba kongsan tam ban pynlong ïa ki samla kum ki nongïalam hapdeng para samla ha ka jingïakhun pyrshah ïa jingdih drok.
Ka bynta kaba kongsan tam jong ka program ka dei ka skit, kaba la bynta bad pynwandur bha kat kum ka DREAM Calendar. Kane ka calendar ka don ïa u QR code uba ailad ïa ki nongdih droks ba kin ïoh jingtip shaphang ki rehabilitation centre bad ki briew bad nombor ba ki lah ban kren.
“Lyngba kane ka skit, ki interns, ym tang ba ki pynsngewthuh paidbah shaphang ka jingma jong u drok, hynrei ki la ai ruh ïa ki lad ki lynti ban pyndonkam haba donkam jingïarap” ong u Director ka DREAM.
Ula ong ba ka Mission ka la shim khia ïa ka rukom treikam kaba pynkupbor ïa ki briew bad ki longïing ba kin lah ban ïoh jingïarap bad jingïasyllok, ka jingïarap ban pynduna ïa ka jingsngew lehraiñ lane jingïakheiñ poh halor ka jingngop ha u drok bad ban wad ïa ka jingsumar, bad ban pynphriang ïa ka khubor ba ka jingïarap ka don bad ka don ka lad ban ïoh biang ïa ka jingkoit jingkhiah.
Lyngba kane ka prokram internship, ki samla pule ki la ïoh jinghikai ba kin lah ban ïalam da lade ïa ki jingpynshai paidbah ha ki skul bad ki kolej, kin long kum ki nongai jingmut ne nongïasyllok ïa ki paralok jong ki, khamtam ïa ki ba lah ban ngop ha une u jingsniew.
“Da kaba pynlah ïa ki samla pule ban ïalam hi dalade ïa kine ki jingpynsngewthuh paidbah. Kane ka internship program ka thaw ïa ka rukom ïada kaba kham myntoi bad kaba neh shyrta hapdeng ki samla” ong u Bah Kharshiing.
Ka prokram ka tei ruh ïa ka jingshaniah ha lade, ban long nongïalam, ka jingnang ban ïakren, bad ka jingsngewthuh kaba kham khlaiñ ïa ka jingthmu lyngba ka jingïatreilang bad jingïashim bynta ha ka imlang sahlang.
“Ka DREAM ka ngeit ba ka jingdon ki paralok kiba bha ka long ka bynta kaba kongsan ha kaba pynwan dur ïa ka jinglong jingim, khamtam hapdeng ki samla” ong u Bah Kharshiing.
Ym kum ki prokram pynsngewthuh ba ju long kiba shaniah ha ki jinghikai ba shiliang, ka rukom treikam jong ka DREAM ka pynleit jingmut ha ka jingïashim bynta ba radbah jong ki samla bad ka jingïadei bad ki paralok.
Da kane ka jingthmu, ka DREAM Mission ka pynkup bor ïa ki samla pule ban long ki Nongmihkhmat Pyrshah ïa u Drok hapoh la ki jong ki skul, ki kolej, bad ki shnong ki thaw.
U Bah Kharshiing ula ong ruh ba ka DREAM ka thmu ruh ban pynïar ïa kane ka jingthmu ha ki bnai ban wan da kaba pynrung shuh shuh ïa ki samla pule na kiba bun ki college kiban long kita ki “shipai jong ki Nongmihkhmat Pyrshah ïa u Drok”—kiba dang ïai bteng ban pynkhih, ban ai mynsiem, bad ban trei kum ka bor kaba bha hapoh ka imlang sahlang.