Shillong, Jymmang 21: Ka North Eastern Council (NEC) ka la bteng ban pynïar ïa ka jingïatreilang ha ka roi ka par ha ka jylla Meghalaya lyngba ka jingpynlut pisa kaba paka ha ka pule puthi, ki jingtei ha sor, ka jingseng kam seng jam, ka lad kamai jong ki nongshong shnong, ka jingïatreilang bad ki jingtei ïa ki jaka ïalehkai ha ka Finance Commission 15, da kaba pynthikna ba kan don ka jingkular ha ka jingkiew shaphrang ha kane ka jylla.
Ka jylla ka la ïohpdiang ïa ka bai lut bai sep haduh T. 555.63 klur hapoh ki skhim jong ka NEC (SoNEC) bad NESIDS Roads programmes ha kane ka Finance Commission 15.
Katba ka bai lut bai sep jong ka Finance Commission 15 ha Meghalaya hapoh ki skhim jong ka NEC, ka Meghalaya ka lah ïoh ban kheiñ ne ïathuh ïa ka jingkiew kaba khraw ha ka liang ka roi ka par ha kane ka Financial Commission ba 15, ha kaba ka la kot ka bai lut bai sep haduh T. 160.87 klur, lem bad ki jingïarap ha ka ban pynroi ïa ki jingtei ha kane ka imlang ka sahlang.
Ki jingtei kum ki ïing skul, ki ïew, jingkieng, ka jingpynbiang ïa ki jaka jngohkai pyrthei, ka jingkyrshan ha ka koit ka khiah bad ka jingsdang ha ka ban pynroi ïa ka jingseng kam seng jam.
La ban jur halor ka kam rep riang bad ki bynta ba ïatreilang lyngba ka jingpynïaid ïew ïa ka ngap, ka jingrep ïa ki tit, ka jingpyntreikam ïa u shynrai Lakadong, ka jingpynroi ïa ki kam ri mrad, ka rep ka riang khlem dawai bad kiwei kiwei ki lad jong ka rep ka riang.
Ki skhim kiba la pynlut tyngka da ka NEC ki la kyrshan ruh ban pynneh bad kyntiew ïa ka dustur ka riti ka Meghalaya da kaba tei ïa ki jaka pyni dustur, ka ïing dorbar bad ka jingtei ïa ki jaka jngohkai pyrthei, katba ka imlang ka sahlang kaba kyntiew ïa ka mariang bad ka lad ïohkam ïohjam ki nongshong shnong ha kylleng kane ka jylla.
Ha ka jingbynrap, ki lad jingïarap jong ka SoNEC ki pynshkem ha ka ban pynroi bad pynjanai ïa ki sap ki phong, ka jingseng kam seng jam na ka bynta ki kynthei, ka jingtei ïa ki ïew, ka jingpynkhuid bad pynbeit ïa ki jaboh bad ka jingpynbiang ïa ki jaka pule puthi, khamtam ha ki nongkyndong, jaka jong ki riewlum bad ki shnong kiba sahdien.
Haba kren kyllum, ka jingpynlut pynsep ka NEC ha ka Finance Commission 15 ka la leh ïa ka bynta kaba kongsan ha ka ban pynïar ïa ka roi ka par ha ka jylla Meghalaya, khamtam ha ki jaka ba jngai, shnong ba long lum bad ki thaiñ kiba dang duna ka jingïarap bad jingsumar.
Katba ka bai lut bai sep na ka bynta u Ïaïong, 2026 ha Meghalaya (FY: 2026-27), ka long ka jingkular ha ka ban pynkhlaiñ ïa ka jingpynskhem ha ka jingkut jingmut ban kyntiew ïa ka imlang sahlang bad ka pateng samla.
Ka NEC ka la bteng ban pyllait ban bei tyngka ha u Ïaïong, 2026 na ka bynta ki prokjek pynroi ïing shna bad pyrkhat ban kyntiew ïa ka kam ïalehkai ha Meghalaya, kynthup ïa ka jingshna ïa ka lympung ïalehkai ha Madan Tukhon, Jongsha bad ka lympung barit ba hap shabar ka lympung heh ha Gambegre, ha ka distrik jong ka thaiñ shatei lam sepngi jong ka Ri Lum Garo.
Kine ki skhim ki long ka jingthmu ban pynneh ïa ki jingtei jong ki kam ïalehkai, ka jingpynshlur ban pyni ïa ka rukom im kaba bha bad kaba koit kaba khiah bad ban pynkupbor bad pynsan ïa ka sap ka phong ha ki jingïalehkai ki khun samla ka jylla.
Ka jingbei tyngka kaba la pyllait hapoh ka NESIDS (Roads) ha u Iaiong, 2026 ha Meghalaya, ha kaba ka NEC ka la pyllait ruh ïa ka jingbei tyngka ha u Ïaiong, 2026 na ka bynta ka projek ba bteng, kum ka jingshna ïa ka jingkieng ba kongsan kynthup ïa ki lynti ban kiew na ka Wah Umngot hapoh ka jylla Meghalaya ban pynurlong bha ïa ka.
