Hap hiar ki nongshong kali ban khyllie bad pyndap maw ha surok Umshynrut

Nongstoiñ, Jymmang 19: Ka shnong Umshynrut ha West Khasi Hills ka dei ka shnong kaba la rim bha, hynrei haduh mynta kam pat don satia ïa ka surok kaba biang kaba lah ban kyntiew ïa ka ïoh ka kot bad ka kamai kajih jong ki paidbah katei ka thaiñ, ba kynthup naduh ka shnong Shilliangrynñiaw, Tlon, Phodjalei, Umshynrut bad kiwei kiwei ki shnong kiba don ha katei ka thaiñ.
U Bah B. Tyrsa uwei na ki nongïalam jong ki samla katei ka thaiñ haba ïakren bad u nongthoh khubor u la ong, “Lada ïaid da ka kjat na Rwiang haduh Umshynrut ka shim por kumba saw kynta ei ei, kata lada dei kiba khlaiñ ban ïaid. Hynrei lada dei ki ba tlot kan shim por kumba saw kynta shiteng ne san kynta duna”.
U la ong ruh, “ha ki aïom tlang kiba pom dieng supply na katei ka thaiñ, ki maramot ïa ka surok bad ki kali ki lah ban poi haduh kitei ki thaiñ. Hynrei ha ka por lyiur te ka shem jingeh haduh katta katta wat ïa ki trok ba ki lah ban ïaid”.
Shuh shuh u la bynrap, “Ha ki snem ba la dep namar ba ki paidbah ki la jynjar palat ha ka leit ka wan, kumta kim banse ban ïa mih bad maramot hi ïa katei ka surok kit dieng, ha ryngkat ka jingïarap jong ki nong trei dieng supply. Pynban mar shu wan ka lyiur ka surok ka la sniew ar shah”.
“Na ka liang ki paidbah ki la ïaleh shitom katba lah ban maramot tang ban lait ki Mahindra Pickup. Don bun ki khep ba tang ban poi kham kloi sha ki jaka ba ki thmu ban leit, ki rangbah ki hap ban hiar shwa ban sei ki lyngka ban khyllie maw bad pyndap maw ha ki jaka ba thliew palat”.
U la ong ruh, “Don ki por lei lei haba poi ha ki jaka ba ktieh bad ba kham thiep, wat ki longkmie kiba bah khunlung ha ka met ruh teng teng ki hap ban hiar bad khynñiat lang ïa ka kali bad ki rangbah, tang ba kan lait na ki jaka kiba ktieh ba ki sahkut”.
“Teng teng la I thamula bad teng teng la isynei hynrei kim banse, namar ban ïaid da ka kjat ruh ka shem jingeh nalor ba ka dei ka lynti khlaw kaba khohruh khohram. Kumta kim banse ban shong hajrong jong ki Mahindra pickup wat la ka jingkynthih jong ka kali ka la long palat liam”.
Halor katei ka jingeh, u la ong ba lada ka sorkar bad u nongmihkhmat ki sngew lem ïa ki paidbah ka thaiñ, kan sngewbha ban phai khmat lem ban pynpoi surok sha katei ka thaiñ, khnang ba ki paidbah kin ym jynjar sah baroh shirta.
Nalorkata u la ong ba katei ka thaiñ ka dei kaba ki jingmih kum u synsar, ki soh ki pai bad kiwei kiwei ki jait mar rep ka jur bha, hynrei tang na ka daw jong ka jingbym don surok, bun bah ki mar rep khamtam eh ki soh ki shu pyut ei, namar ban leit die wat tang ka bai kit ruh kam mih satia.