Ym pat don jingduna petrol bad diesel ha Meghalaya poi kumba ju poi man ka sngi

Shillong, Jymmang 19 : Ki kompani Umphniang petrol bad diesel ki la pyntip ba kam shym don satia kano kano ka jingpyrkhing ïa ka jingsam umphniang kali ha Meghalaya bad ka jingshalan ne pynpoi ïa ka petrol, diesel bad LPG ki dang ïai bteng kumba ju long man la ka sngi khlem kano kano ka jingthut ha baroh kawei ka Jylla.
Ha ka kyrwoh bala pynlait ha ka sngi Ba-ar, ka Indian Oil, Bharat Petroleum Corporation Limited bad ka Hindustan Petroleum Corporation Limited, ki la ong ba ki la pynthikna “ban nym don jingthut ha ka jingïoh ïa ka petrol (MS), Diesel (HSD) bad Liquified Petroleum Gas (LPG) ha baroh kawei ka Jylla Meghalaya” wat hapdeng ki jinglong jingman ki bym i thikna ha ka pyrthei kaba ktah ïa ka jingshalan ïa ka umphniang bad gas.
Kine ki kompani ki la pyntip ba ki la pynkhreh bha ïalade ban pynneh khlem ka jingthut ïa ka jingpynpoi ïa ka umphniang lyngba ki terminal ba ka don, ki depot, LPG bottling plant bad ki retail outlet ha kylleng ka Jylla.
Kat kum ka jingong kine ki kompani, ka jingtreikam jong baroh ki retail outlets (petrol pump) ki dang long beit kumba ju long. “Ka jingai umphniang ka dang ïaid beit ïaid ryntih ha baroh ki petrol pump” ong ka kyrwoh.
Ki kompani ki la ong ba ki jinglum thup (stock) ki dang long kiba biang bad kiba ju pyndap man ka por. Ka jingsam ia ka LPG ruh kam shym la shah ktah. “Ka jingsam LPG ïa ki longïing ruh ka dang ïaid beit kumba ju long ha baroh kawei ka Jylla Meghalaya” kila bynrap.
Kila kyntu ïa ki paidbah ba kim dei ban khuslai bad ba kin ïathied lypa ïa ki mar da ka jingtieng haba kyntu ïa ki paidbah ba kin shaniah ha ki tyllong khubor kiba lah ban pynthikna.