Shillong, Naitung, 17: Ki nongtrei jong ka EMRI-108 kiba don hapoh ka shatri jong ka Meghalaya EMRI Workers’ Union (MEMRIWU) ki la rai ban ïaid beit shakhmat ïa ka jingïakhih kaba khlem pud sngi watla u Mission Director jong ka National Health Mission (NHM) u la buh por ban khot ïakren ïa ki nongïalam jong ka Seng ha ka Lah Sngi u Blei.
“Ngin burom ïa ka jingkhot ïakren jong u Mission Director hynrei ka jingïakhih kaba khlem pud sngi kan ïaid beit kumba ladep pynbna naduh ka por 4:00 baje mynstep,” ong ka President ka MEMRIWU ka Kong Microlina Syiemlieh ha ka jingïakren bad u Mawphor lyngba ka Telephone.
Ka la ïathuh ba ka Union kan dawa tyngeh ïa ka Sorkar Jylla ban kyndang noh ïa ka GVK namarba ka jingdkoh treikam ka la nang jur bad ka jingdon jong kane ka kompeni mynta ka long tang kum ka shynrong.
Hadien ba la kut ka jingaipor kaba 72 kynta ïa ka Sorkar, hynnin ka sngi Saitjaiñ u Joint Mission Director jong ka National Health Mission (NHM) u la khot ïakren ïa ki nongïalam jong ka MEMRIWU ha kaba um shym la lah ban ai ïa kano kano ka jingkular hynrei u la shu kular tang ban rah ïa ka jingdawa jong ka seng sha ki bor bahalor.
“Ngin sa peit kaei kaba mih na ka jingïakren, lada ka jingïakren kam poi shano shano ruh ka jingïakhih kaba khlem pud sngi kan ïaid beit shakhmat,” ka la ong.
Ka la ïathuh ba ka jingaipor jong ki 72 kynta ïa ka sorkar jylla ban weng ïa ka GVK kum ka nongpynïaid ïa ka EMRI ka la kut hynrei haduh mynta ka Sorkar Jylla ka dang leh kyllut bad kam pat don kano ka jingkhot ïakren bad ka Seng.
Haba kylli ka la ong, “ngi kwah ba kano kano ka Kompeni kaba wan shimti hadien ïa kane ka Emergency Services kam dei shuh ban dang jia kumba ka long mynta bad ngi kwah ba ka Sorkar kan pyntreikam da ka Nomination Mode ym da ka Tender Mode khnang ba ka kompeni kan ym lah ban lehmon bad iuhroit ïa ka hok jong ngi ki nongtrei bad ban ai ruh ïa ka jingshakri kaba kham bha sha ki paidbah nongshong shnong ha ka jylla baroh kawei.”
