Bun ki kolej bad ki skul bah (University) ki hap ban rakhe ïa ka jingdap 50 snem ka jylla Meghalaya bad don shibun ki jingïatai bad ki jingai jingmut halor ki phang bapher bapher. Ka phang kaba nyngkong eh ka long – hato kita kiba ïaleh ban pynïoh ïa ka jylla Meghalaya ki don mo ka jingïohi jngai (vision) bad ka jingpruid dak (roadmap) shaei ba ki kwah ban ïalam ïa kane ka jylla jongngi. Ban sngewthuh bha ïa kane ka phang nga la ktaid bha ïa kiba bun ki dulir ban peit kaei ka jingthoh kaba lah ban kdew ïangi lada ki nongïalam jongngi ha kato ka por ki la sngewthuh shai ne em kaei ka jingthmu kaba ki don haba ki ïa duriap bad ïakhun ban ïoh ïa la ka jong ka jylla ha kaba ki Khasi-Jaintia bad Garo kin long ki nongïalam, ym shuh ki Assamese.
Hynrei kaba phylla ka long ba ka seng kaba ïalam ïa ka jingïaleh ban ïoh ïa ka jylla lajong – ka All Party Hill Leaders’ Conference (APHLC) ha kata ka por kam don kano kano ka jingthoh kaban kdew lynti shaei ba ki nongïalam ki kwah ban ïalam ïa kane ka jylla bad ïa ki briew jong ka. Ngi don bun ngut kiba nang ba stad kiba bat ïa ka kyrdan nongïasaid aiñ kum u Bah BB Lyngdoh bad kiwei de ki khraw pyrkhat kum u Rangbah Hoover Hynniewta bad GG Swell. Nangta na ka liang ki Garo ruh don u Captain Williamson Sangma. Hato kane ka dei namar ba shitom ban ïamir jingmut namar ba ïapher palat ki jingïohi jngai bad ym lah ban poi sha kano kano ka jingïasngewthuh jingmut. Ha kato ka por ka Election Commission of India kaba rai ban ithuh (register) ïa ki seng saiñ pyrthei ruh ka la ai ïa ka registration bad ïa u mohor syntiew kulab wat la ka APHLC kam shym don ïa kano kano ka jingthoh kaba shai.
ïa kane la lap ha ka por ba ki jong u Bah BB Lyngdoh, PR Kyndiah bad kiwei ki rangbah APHLC ki leit mudui sha ka Gauhati High Court halor ka jingpyrshang jong u Captain Sangma ban ïasnoh noh bad ka seng Congress ha ka jingïalang kaba lah long ha Mendipathar. Hooid u Captain Sangma u long u Chief Minister ba nyngkong eh ka jylla hynrei imat ma u ruh u sngewthuh ba ka seng APHLC kam don shuh ïa ka jingthmu ba shakhmat hadien ba la ïoh ïa ka jylla Meghalaya. Kane ka long ka daw ba kongsan ba haduh mynta mynne ruh ym pat lah ban ïa pynbeit u pud u sam bad ka jylla Assam. Mynta haba kane la sorkar MDA ka pyrshang ban pynbeit katba lah ei, ki don bun ki jingkhohñioh hana ba lah ai sha ka Assam ïa ki jaka kiba dei hok jong ka jylla Meghalaya. Toi ka jingpynbeit pud ka dei ban long ka jingthmu ba nyngkong eh haba la ïoh ïa ka jylla. Hooid ka lah don ka North East Reorganisation Act, 1971 kaba dei ban pynbeit pud ïa ki jylla ki ban thaw thymmai na ka jylla Assam.
Ha kane ka dulir ym shym la kren shai shaphang u pud u sam hapdeng ka Meghalaya bad Assam hynrei la shuh ong ba kito ki jaka (territories) kiba ha shuwa u snem 1972 ki hap hapuh ka jylla Meghalaya (autonomous state of Meghalaya) kaba la thaw katkum ka Section 3 jong ka Assam Reorganisation (Meghalaya) Act, 1969 (55 of 1969); bad kita baroh ki jaka territories) kiba kynthup ïa ka cantonment bad jaka Municipality ha Shillong ïa kiba ym shym la kynthup ha ka por ba ai ïa ka autonomous state lane ka jylla synshar hi, mynta kin ym long shuh shi bynta jong ka jylla Assam. Tang katta ka jingthoh ha ka NE Reorganisation Act kaba mut ba ym shym don jingthoh ei ei shaphang ki shnong bad ki jaka kiba mar khap bad ka Assam (border areas). Ki nongïalam jongngi ha kato ka por kim shym la shim khia ïa kane ka phang namar ha u snem 1976 la sdang ka ïa pait ïa pra ka politiks hadien ba u Captain Sangma u thmu ban khrai khlieh noh ïa ka APHLC bad HSPDP. Kane ka jinglong jong ka politiks ha ka jylla Meghalaya ha kaba ki nongthaw aiñ (legislators) ki bun kam ha ka ban ïaknieh shuki bad ïa kynthih na kawei ka seng sha kawei pat bad ym don por ban duriap ha ka synshar khadar.
Dei namar kane ka daw haduh u snem 1988 haba wan u PA Sangma kum u Chief Minister u lyngoh ngaiñ ba ym don tang kawei ruh ka polisi trei kam (policy) ha kano kano ruh ka tnad sorkar. Nga kynmaw ba dei ha ka por u PA Sangma ba sa sdang ban thaw ïa ka polici na ka bynta ka koit ka khiah (health policy) hadien ba u la pynleit por bad ki riew pyrkhat pyrdaiñ kiba nabar jylla. U la pyrshang ruh ban wanrah ïa kiwei pat ki polisi trei kam ha kiwei pat ki department kum ka thoh ka pule (Edication) bad ka ïoh ka kot (Finance Policy) hynrei namar ba u ïoh por tang kumba ar snem bad u lah shah pynkhyllem noh ha ka kynhun ki seng riewlum u PA Sangma um shym la lah ban pyndep ïa ka jingthmu baïar jong u na ka bynta ka jylla Meghalaya.
Haduh mynta ruh bun ki Department kum ka rep ka riang (Agriculture & Horticulture) bad ka thoh ka pule (Education) kim don satia ïa kano kano ka ka jingkdew ka ban ïalam ïa ki shakhmat (vision for the future). Dei na kane ka daw ba ka Education Department ka don bun jait ki nonghikai kiba hap ha ki bhah bapher bapher ban ym shym la pynbeit ïa kane haduh mynta mynne ruh. Bad dei kane keiñ kaba pynlong ïa ki nonghikai ba kin ym ïoh tulop thikna man la u bnai. Lah shu pynjlan ïa kane ka jingpynbeit haduh ba mynta imat lah poi haba kut lad bad sorkar bad ki nonghikai.
Ka don ka jingong ha ka Baibl ba haba ym don ki nongïalam kiba ïohi jngai ki paidbah ki poi ha ka jingeh (where there is no vision the people perish).
Te haba kumta ïa kaei keiñ ngi ia rakhe jingdap 50 snem haba kawei ruh ka skul bah kaba pynïaid da ka sorkar jylla (State University) lane ka skul pule doctor (Medical College) ruh ngim pat don, katba ka jylla Assam jan man la ka san snem ka lah ban tei ki medical college jan ha man la ka distrik. Hangne keiñ ka jingïapher haba ïoh ki nongthaw aiñ kiba kit khlieh bad kiba ym shu kwah tang ïa ka bor bad ban pynïar ïa ka spah ka phew shimet jong ki.
Mynta ka kynti te imat ka jingïaleh ha ka konstituwensi Nongkrem kan long kaba itynnad bha ban peit namar ka jingïaleh imat ka long hapdeng ki heh spah. Ah shano ki balang bad ki seng bhalang kum ha kine ki khep?
