Shillong, Naitung, 17: Ki 60 ngut ki MLA bad arngut ki MP jong ka jylla Meghalaya ryngkat lang bad ki MLA bad MP jong ka ri baroh kawei ha ka Lah Sngi u Blei kin sa ïashim bynta ha ka elekshon jied President ba khat hynriew jong ka Ri India.
Ha kane ka elekshon, ki MLA kin sa thep ïa ka vote ha la ka jong ka jylla katba ki MP kin thep vote ha Parliament.
Ha Meghalaya ki 60 ngut ki MLA kin thep ïa ka vote ha Iingdorbar Thawaiñ naduh ka por 10:00 baje mynstep haduh ka por 3:00 baje noh phai sngi bad la khmih lynti ba baroh ki MLA kin wan poi ban thep ïa ka vote jong ki.
Ka ophis jong ka Meghalaya Legislative Assembly ryngkat bad ka tnat Election jong ka jylla ka la pynbit pynbiang nadong shadong ïa ki jingdon kam na ka bynta kane ka elekshon hapoh ka jingpeit jingkhmih jong ka Election Commission of India (ECI).
Naduh ba la wan poi ka synduk thep Vote na Delhi sha ka jylla la buh bha ïa ka hapoh ka kamra kaba kyrpang jong ka Assembly bad la ap phara da ki bor Pulit ban peit ba ka nym don kano kano ka jingthut haduh ban da sei ïa ka ha ka sngi thep vote.
