Bun ki Rehabilitation Centre kiba la treikam bad don kiba dang tyrwa, pyntip ki Sahep sorkar ha u CM

Shillong, Jymmang 16 : U Myntri Rangbah ka Jylla Conrad K Sangma ha ka sngi Saitjain u la lum ïa ka jingïalang buddien bad ki ophisar haba ïadei bad ka jingpyntreikam ïa ki projek iakhun drok kaba tip kum ka Drug Reduction, Elimination, and Action Mission (DREAM) ha State Guest House, Taraghar.
Ha kane ka jingïalang, u Myntri Rangbah u la banjur ïa ka jingdonkam ban don ka jingïatrei lang kaba jan bad kaba ryntih jong ki paidbah ban pynjur ïa ka jingai jigpynshai bad ki lad ki lynti na ka bynta ban ïakhun pyrshah ïa u drok ha ka jylla. U la banju rruh ïa ka jingdonkam ban don da ka rukom treikam kaba ryntih kaban buddien ïa kane ka jingtreikam hapoh ka projek DREAM.
La wan ban donlang ha ka jingïalang naduh ki ophisar jong ka Social Welfare Department nalor kiwei ki tnad sorkar kiba la buddien bad bishar bniah ïa ka rukom pyntrei ïa ki jingtei bapher bapher kiba ïadei bad ka projek ha kylleng ki bynta jong ka jylla. Kine ki kynthup naduh ki centre kiba la trei bad kumjuh kiba dang don ha ka jingtyrwa na baroh ki distrik.
Na ka liang ki ophisar ki la pyntip ba ki don bun bha ki rehabilitation centgre kiba la treikam bad ki dang don bun kiwei pat kiba dang tyrwa kiba don ha ka jingbishar bniah.
Katto katne na ki jingeh ba ki kdew ha kane ka jingïalang ki kynthup ha ka jingpynslem ban ai ïa ki Non Objection Certificates (NOC), ka jingshem jingeh ban ïoh ïa ki jaka bad kiwei kiwei.
“Ka kam ka la ïaid beit shakhmat ban pynwandur bad ka jingpyntreikam na ka bynta ki rehabilitation centre ban pyntikna ïa ka jingtreikam kaba kloi bad kaba stet,” ong ki ophisar.
La pynpawe ruh ba bun na ki jingshakri jong ki rehabilitation centre hapoh ka DREAM ki dei kiba teikam bad kyrshan daka jingtrei lang jong ka sorkar bad ki kynhun mon sngewbha bad kumjuh ki kynhun niam.
Nalor kine, ka la don ruh ka jingbuddien ïa ka jingtreikam ki pulit hapoh ka DREAM kaba kynthup naduh ka jingkurup bad ka jingkem bad kumjuh ïa ki lad jingïada kiba ïadei katkum ki kyndon ain.
Ka jingïalang ka ïa kren ruh halor ka jingdonkam ban don ka jingïatrei lang kaba jan hapdeng ki tnad sorkar ban pynstet shuh shuh ïa ka jingpyntreikam bad ban pyndep ha ka por ba la buh.