Shillong, Jymmang 15 : Ka Tnad Kam Ïalehkai jong ka sorkar pdeng, lyngba ka MY Bharat, ha ka jingïatreilang bad ka Tnad Kam Pohïing, ka la sdang ïa ka quiz ha ka ri na ka bynta ka Viksit Vibrant Villages Programme (VVVP) 2026 ha ka rynsan MY Bharat [MY Bharat portal]. Kane ka quiz kadei ka bynta ba nyngkong jong ka jingjied na ka bynta ki samla ban ïashim bynta ha ka prokram pynïadei bad ki shnong khappud ba la buh ban pynlong ha u bnai Jylliew 2026.
Ka Viksit Vibrant Villages Prokram 2026 kadei ka sienjam ha ka ri kaba ïalam da ki samla kaba thmu ban pynkhlaiñ ïa ka jingïashim bynta ha ki shnong, ka jingïatreilang bad ki paidbah, ka jingïasam ïa ka kolshor bad ka jingpynsngewthuh ha kaba ïadei bad ka jingkyntiew ïa ki shnong khappud ha ki thaiñ kiba kongsan kynthup ïa ka Leh-Ladakh, Himachal Pradesh, bad Uttarakhand.
Ïa kane ka online quiz la pynlong naduh ka 10 tarik Jymmang haduh ka 20 tarik Jymmang 2026 bad la plie na ka bynta ki samla ha kylleng ka ri. Ka sienjam ka ïaleh ban kyntiew ïa ka jingsngewthuh hapdeng ki nongïashim bynta ha kaba ïadei bad ka jingangnud bad ki jingthmu jong ka Viksit Vibrant Villages Program, katba ka pynshlur ïa ka jingïashim bynta shitrhem jong ki samla ha ka jingtei ïa ka ri bad kyntiew ïa ka imlang sahlang ha ki jaka khappud.
Ka quiz kan long kum ka rynsan ban ïakren na ka bynta ki nongïashim bynta ban tip shaphang ka jingkylla ha ki shnong khappud, ka kolshor jong ka thaiñ, ka jingsngewthuh shaphang ka mariang, ki sienjam ba ïadei bad ka jingsynshar, ka jingïashim bynta jong ki paidbah, bad ki sienjam jong ka sorkar ban pynkhlaiñ ïa ki thaiñ khappud.
Ki nongïashim bynta kiba leh bha ha ka quiz kin shah bishar bniah ïa ka jingïoh lad ban ïashim bynta bad ka jingbit jingbiang, hadien kane yn jied ïa 500 ngut ki volunteer jong ka MY Bharat na kylleng ki Jylla bad ki Union Territory ban ïashim bynta ha ka Viksit Vibrant Villages Program kaba shi taïew ka ban long ha u bnai Jylliew 2026.
Ki volunteer kiba shah jied kin ïashim bynta ha ki kam bad ka pynsaphriang jingtip sha ki paidbah ha kylleng ki shnong khappud ba la ithuh. Ka prokram kan kynthup ïa ki kam Swachhta, ki prokram ïamir jingmut bad ki samla, ki sienjam ba ïadei bad ka mariang, ki kam ïasam ïa ka kolshor, ki jingpynsngewthuh paidbah, ki jingïalang ai jingmut shaphang ka kam, bad ki lad ïoh jinghikai lyngba ka jingpyrshang dalade kiba la peit bniah ïa ka roi ka par ha ki jaka nongkyndong bad ka jingïatylli ha ka ri.
Ka sienjam ka pyni ïa ka jingangnud jong ka Sorkar ban pynkupbor ïa ki samla kum ki nongnoh synniang kiba radbah sha ka Viksit Bharat @2047 bad ban pynkhlaiñ ïa ka jingai jinghikai ha kaba ïadei bad ka jingdonkam jong ki shnong khappud kiba khlaiñ bad kiba skhem.
Ki samla kiba kwah ban ïashim bynta ki lah ban ïashim bynta ha kane ka quiz lyngba ka MY Bharat portal.
