Mawkyrwat, Jymmang 14: Kum shibynta jong ka jingrakhe ïa ka jingdap 25 snem naduh ba la seng ïa ka ha ka kam ai jinghikai, ka Mawkyrwat Presbyterian Secondary School ka la pynlong ïa ka Inter School Sports Meet 2026 mynta ka sngi ha madan Motmeron, Jakrem.
Ha kane ka lympung jingïalehkai, san tylli ki skul ki la wan ban ïashimbynta, da kaba pyni ïa ka mynsiem jingïatylli bad jingïatreilang hapdeng ki khynnah pule bad ki nonghikai.
Ki jingïalehkai kiba la pynlong ki kynthup ïa ka jingïakop mareh 100 meter, 200 meter, Relay Race, Long Jump, Javelin Throw bad Shot Put, ïa kiba la pynïakhun ïa ki khynnah shynrang bad kynthei.
Kane ka jingïalehkai ka long ka bynta kaba kongsan ha ka jingrakhe ïa ka Silver Jubilee jong ka skul, bad ka pynpaw ïa ka jingangnud jong ka skul ban kyntiew ïa ka pule puthi ryngkat bad ka sap jingïalehkai jong ki khynnah pule.
Ïa ka jingïalehkai la plie paidbah da u bah Pynkhawbor Kharjahrin, MDC ka Mawkyrwat Constituency uba long u kongsan, katba ïa ka jingïalang pynhap pyrda la wan ban long kongsan da u bah Roykupar Synrem, uba dei u Advocate bad Prominent Social Activist ha ryngkat ka jingdonlang ki khynnah skul, ki nonghikai, ha ryngkat ki kmie ki kpa jong ki khynnah.
