Paw kyrteng u Ricky Shabong ha ka kynhun India kaba don 28-ngut ban pynkhreh ïa ka Unity Cup 2026
NEW DELHI, Jymmang 14: U coach jong ka kynhun phutbol ba la rangbah jong ka ri India u Khalid Jamil, ha ka sngi Palei, ka 14 tarik Jymmang, 2026, u la pynbna ïa ka thup kyrteng kaba don 28-ngut ki nongïalehkai kiba lah ban shah khot ban mih madan ïa ka ri ha ka lympung ïalehkai jong ka Unity Cup 2026.
Napdeng kine ki 28 ngut ka la paw ruh ka kyrteng jong u Ricky Shabong, rangïalehkai ba ka jylla Meghalaya ka la pynmih uba mih madan ïa ka Punjab FC ha ka ISL, bad un don bynta bad ka kynhun kaba thmu ban ïalum lang ha Bengaluru, na ka bynta ka prokram kilanmet kaba lyngkot, hadien ka jingpyndep ïa ka Indian Super League 2025-26, hashuwa ba kan mih ban leit sha London, ha ka 24 tarik Jymmang, na ka bynta ka Unity Cup.
Nangta u Khalid Jamil, un bishar bñiah ïa ki nongïalehkai ha kane ka prokram kilanmet ba lyngkot, ha shwa ban jied ïa ka kynhun ba khatduh ka ban kynthup ïa 23 ngut ki ban leit sha London na ka bynta ka Unity Cup.
“Ka Unity Cup kan long ka lad kaba biang bha na ka bynta jong ngi ban pynkhreh ïa ki lympung kum ka SAFF Championship kham hadien mynta u snem. Ngi donkam ban pyndonkam ïa man la ka por ba don ha ka FIFA ban pynkhreh ïa ki jingïalehkai kiba ngi don ha khmat,” la ong u Khalid Jamil.
“Ngi la jied ïa ki 28 ngut ki nongïalehkai na ka bynta ka kynhun ba nyngkong, katkum ka jinglah ban ïalehkai jong ki ha ka ISL kaba dang ïaid shakhmat. Ngin sa ïoh ar sngi ban bishar bñiah ïa ki shwa ba ngin jied ïa ki 23 ngut,” u la ong.
Ka India (kyrdan ba 136 ha ka FIFA) kan ïakhun pyrshah ïa ka Jamaica (kyrdan ba 71) ha ka Semi Final kaba ar ha ka 28 tarik Jymmang, katba ka Nigeria (kyrdan ba 26) kan ïakhun pyrshah ïa ka Zimbabwe (kyrdan ba 130) ha ka Semi Final ba nyngkong ha kajuh ka por. Ki ar tylli ki kynhun kiba shah rem kin ïalehkai ïa ka play-off ban ïoh ïa ka kyrdan kaba lai ha ka 30 tarik u Jylliew.
“Ngi ïakhun pyrshah ïa ki kynhun kiba khlaiñ kiba ïalehkai ha ka kyrdan kaba bha. Nga tharai ba kine ki jingïalehkai kin ai shibun ka jingshemphang ïa ki nongïalehkai bad kin ïarap ïa ngi ban ïalehkai ha kane ka kyrdan. Ngi dei ban ïalehkai kham bun ïa ki jingialehkai kiba kum kine,” ong u Jamil.