Pynkup burom ka NPP ha ka ‘Mother’s Day’ ïa ki 111 ngut ki longkmie ba shakri ïa ka imlang sahlang

Shillong, Jymmang 10 : Ka National People’s Party Women’s Front, West Jaiñtia Hills Unit ha ka Sngi U Blei, ka la pynkup burom ïa ki 111 ngut ki longkmie namar ka jingshakri jong ki ha ka imlang sahlang ha ka prokram ai khublei ïa ki longkmie lane ka Mother’s Day-cum-felicitation, ba kynmaw ïa ka jingnoh synñiang ban kyntiew ïa ka imlang sahlang.
ïa kane ka prokram pynkup burom ïa ki longkmie kiba la shakri paidbah bad trei shitom na ka bynta ka bha ka miat jong ka imlang sahlang, la pynïaid da ka chairperson ka NPWF West Jaintia Hills ka Kong Lily Phawa.
ïa ki longkmie la pynkup burom da u Bah Octomewot Lamin uba dei u Nominated MDC bad u Bah Reformingson Lamare u ba dei u Working President ka NPP ka Jylla uba dei ruh u MDC ka 7 Nartiang-Wahiajer.
Ka Kong Tngenris Sutnga haba ai jingkren ka la ong ba ka jingaiti lut bad ka jingshakri jong ki longkmie ka long kaba kongsan bha na ka bynta ka roi ka par ha ka imlang sahlang.
“Ka jingaiti bad jingshakri jong ki longkmie ka dei ka bynta kaba kongsan bha ban kiew ka imlang sahlang” ka la ong.
Kane ka jingïalang ka long kum ka dak jong ka jingïaroh ïa ki longkmie kiba la len lade bad khlem shongthait ban trei na ka bynta ka bha ka miat jong ka shnong ka thaw bad ka Jylla.