Tang ki Shop Open ba plie, bun ki dukan ba khang ha ki kynta jied nongkitkam ka KSU

Shillong Jymmang 10: Katba ka Khasi Students Union ha ka sngi Saitjaiñ ka dang pynlong ïa ka jingjied ïa ki nongkitkam ba thymmai na ka bynta ka samoi treikam jong u snem 2026 haduh u snem 2029 hapoh Dinam Hall, Jaïaw Pdeng Shillong, naduh ka por mynstep, la ïohi ba bun na ki dukan ha ki thaiñ Demseiniong, 4th Furlong, ka thaiñ Polo Shillong, kiba dei khamtam ki dukan jong ki bym dei Khasi ki la khanglut naduh mynstep.
Lah ban pynkynmaw ba ka thaiñ Polo, ter ter shaduh Nongmensong kiba bun hi na ki nongkhaïi kiba buh dukan sha kine ki jaka kidei hi ki bar jylla bad kiwei kiwei pat ki jaitbynriew hynrei kumba la ïohi hi ki dukan jong ki trai shnong ki long kiba duna bha.
Ha ka jingïohi jong u nongthoh khubor haba poi leit sha kine ki thaiñ la shem bad sakhi ba ha kine ki kynta bun shisha na ki dukan kiba khang khyrdep katba ka elekshon pynthymmai nongkitkam ka KSU kaba 16 jong ka, ka dang ïaid.
Hynrei kaba pynsuba ïa ka jingbym shai pat halor kane ka bynta ka long ba jan baroh ki dukan Shop Open ne ki dukan die kiad phareng kiba don syndait syndait kawei hadien kawei ki la plie lut bad ym idon satia kiban khang ha kitei ki por.
Lah ban pynkynmaw ba naduh ki por ba mynshwa ki shait mih beit kum kine ki jingjia khang dukan ha sor Shillong ne Nongbah Shillong la ka dei ha Motphran, ha Khyndailad, ka thaiñ Polo bad kiwei kiwei pat ki jaka ba lah bun hi ki nongkhaïi bar jylla ka ju don bad shait don beit ka jingkhang jong ki trai ne ba shong dukan tang shu lah don kino kino ki jingïakhih paidbah pyrshah Sorkar ne kiwei pat ki jingïakhih ïaid paidbah jong kino kino ki sengbhalang khamtam eh kiba la pynbna da ka Khasi Students Union.
Kane ka jingkhang ïa ki dukan ka long ruh ba kin ïada ïalade na kino kino ki jingshah shim kabu jong ki riewsniew ne ki runar bym lah ban ithuh ban kawang maw, ban pynjulor ïa ki dukan ne kiwei kiwei pat ki jingdon jingem jong ki.