La pyllait paidbah ïa ka kot jingïathuh khana pateng jong ka “Kur Thongni Domshken”

Mawkyrwat, Jymmang 11 : Bah Pius Marweiñ uba dei u MLA bad MDC ka Ranikor Constituency, ha ryngkat ka jingïadonlang jong u Pa’iem Niandro Syiemiong u Syiem ka Hima Maharam Syiemship, bad ki nongkitkam jong ka Kur Thongni Domshken, ki la pyllait paidbah ïa ka kot lyngkdop ka kyrteng ka “Kur Thongni Domshken” kaba ai jingïathuh bniah ïa ka history bad ka jingiaid lynti jong ka Kur Thongni Domshken naduh u snem 1401 haduh u snem 2011.
Ïa kane ka kot la thoh da Bah M. Rose Thongni bad la buh ïa ka krien phira, “Ri kyntang ïa la ka kur ka jait, ka khyndew ka shyiap” ha kaba la pynlong ïa ka jingïalang ha Domshken Secondary School, South West Khasi Hills District.
Ha kane ka kot lyngkdop, la thoh bniah ïa ka jingïathuh khana pateng, ka riti ka dustur bad ka rukom synshar jong ka Kur Thongni, kaba mih tynrai na ka shnong Domshken, kaba hap hapoh ka Hima Maharam Syiemship, South West Khasi Hills District. Ka kot ka pynpaw ruh ïa ka jingïoh jingïathuh khana pateng la pateng kaba kot palat 600 snem tam jong ka Kur Thongni, kiba shong kiba sah ha Domshken bad kiba la saphriang ruh sha kiwei pat ki bynta jong ka Ri Khasi, hynrei kiba dang ïai tylli bad iai bat skhem ïa la ka tynrai haduh kine ki sngi.
Ka Kur Thongni horkit hordang ka la pynpaw ruh ïa ka jingïeng pyrshah jur ïa kino kino ki jingthmu ban pynkylla ïa ka rukom shim jait da kaba ai jait sha u shynrang, namar katkum ka riti ka dustur Khasi, ka jait ka dei ban bud na ka kmie.
Kiba la donlang ha kane ka sngi ki long u bah Pius Marweiñ, MLA & MDC ka Ranikor Constituency kum u kongsan, u Pa’iem Niandro Syiemiong u Syiem ka Hima Maharam Syiemship, bad ki nongkitkam jong ka Kur Thongni Domshken.