Shillong, Jymmang 10 : U Myntri Rangbah ka Jylla ba dei ruh u National President ka National People’s Party (NPP) ha ka sngi U Blei u la phah ka jingkitbok ïa u Myntri Rangbah ba thymmai jong ka Tamil Nadu u C Joseph Vijay halor ka jingshimti jong u ïa ka shuki u Myntri Rangbah ba thymmai ka jylla.
“Ka jingkitbok ïa u Thiru Vijay halor ka jingjam jong u ban tynrong ïa kawei pat ka lyngkor kum u Myntri Rangbah ba thymmai ka Tamil Nadu. Ka jingkitbok ïa u bad ïa ka Kynhun Myntri baroh kawei,” ong u Conrad ha ka rynsan social media.
Ha kajuh ka por, u Myntri Rangbahduh ka Ri, u Narendra Modi u la phah lang ïa kane ka jingkitbok ïa u Vijay halor ka jingshimti jong u ïa ka shuki Myntri Rangbah.
“Ka jingai khublei kitbok ïa u Thiru C. Joseph Vijay hadien ba u la shimti kum u Myntri Rangbah ka Tamil Nadu. Ka jingkitbok na ka bynta ka jingshakri jong u ha ki por ban dang wan. Na ka liang ka sorkar pdeng kan bteng ban treilang bad ka sorkar Tamil Nadu na ka bynta ban kyntiew ïa ka jingim jong ki nongshong shnong,” u la ong ha ka kyrwoh lyngba ka social media.
Na ka liang une u Myntri Rangbah ba thymmai haba pynpaw ka jingsngewnguh ïa u Myntri Rangbahduh ka Ri u la pynpaw ka jingsngewkmen halor ka jingkitbok jong u ha ka sngi ba u shimti kum u Myntri Rangbah.
“Ka thong jongngi hi ka long ban na ka bynta ka bit ka biang jong ki nongshong shnong. Kumta ngi khmih lyunti ba ngin ïoh ïa ka jingkyrshan kaba pura bad ka jingïatrei lang jong ka sorkar pdeng na ka bynta ka jingkiew bad ka roi ka pa jong ka Tamil Nadu,” u la ong.
