Kubur u DTO-EJHD ban pyllait ïa ka jingpyndait ïa ki kor VLTD ha ki kali ba kamai hapoh ka jylla

Khliehriat, Jymmang10: Ki nongialam bad ki dkhot jong ka All East Jaiñtia Commercial Vehicle Joint Action Committee ba la lam khmat da u President, u bah Shining Siangshai myn ha ka 8 tarik mynta u bnai jymmang ki la leit iakynduh ia u District Transport Officer East Jaiñtia Hills District, u bah V.Ryngkhlem bad ong ba u DTO u la kubur ban pyllait ïa ka jingpyndait ïa ki kor VLTD ha ki kali kamai torist ba kynthup ki kali rim bad kiba thymmai kiba kamai tang hapoh ka jylla bad na ka bynta kito kiba kamai shabar ka jylla Meghalaya pat ki hap ban jingpyndait ïa ki kor VLTD.
Na ka liang ka All East Jaiñtia Commercial Vehicle Joint Action Committee ka ai khublei ruh ïa u myntri ba dei peit ïa ka tnat Transport, u bah Sñiawbhalang Dhar uba la iarap ha kaba pyllait ïa kane ka bynta ban jingpyndait ïa ki kor VLTD ha ki kali kamai bad ong ba kum ki nong ñiah kali kamai ki mad shibun ki jingeh namar ba ki hap ruh ban pynbiang ïa kiwei kiwei ki kot ki sla ba donkam bad lada leh sa kane ka ba pyndait ïa ki kor VLTD kan long ka jingban khia ïa ki.
Shuh shuh ki nongialam ka AEJCA-JAC myn ha ka 7 tarik ki la iakynduh bad u myntri ba dei peit ia ka tnat Transport, u bah Sñiawbhalang Dhar bad ki la buh ruh da ka jinghtoh hakhmat u myntri sorkar bad katkum ka jingthoh ba la soi kyrteng da u President, bah Shining Siangshai bad u Secretary, u bah R.Chyrmang ka AEJCA-JAC la pynpaw bad ong “Ngi ki seng kiba mihkhmat ia ki trai bad ki nongniah tourist kamai na East Jaiñtia Hills kaba kynthup ïa ka Latyllilang Drivers and Tourist Taxi Association, East Jaiñtia Taxi’s Owners Drivers Association, Ladrymbai-Jowai East Jaiñtia Hills District Tourist Taxi Association bad ka East Jaiñtia Tourist Taxi’s Owners and Drivers Association, Ladrymbai ngi pynpaw ka jingsngewkhia kaba jur ha kaba ïadei bad ka jingthmu ban pyntreikam ïa ki VLTD ha ki kali jong ngi halor ka nongrim ba kan ktah jur ïa ki trai bad ki nongñiah tourist taxi,”
Ki la ong ruh ba ki burom bad kyrshan ia ki sienjam jong ka sorkar kaba thmu na ka bynta ban kyntiew ïa ka jingshngaiñ jong ki nongleit nongwan bad pynbha ha kaba iadei bad ka leit ka wan, hynrei ki kwah ban pynpaw halor ki bynta ba ïadei bad ka aiñ bad ka jingtreikam jong ki kor VLTD.
“Ka long ka jingsngewthuh jong ngi ba ka jingpyntreikam kyllum bad mardor ïa ka VLTD na ka bynta baroh ki kali kamai tourist khlem ka jingkyrshan pisa ka ktah jur ïa ki nongpyniaid kali kiba rit ba ria kum ma ngi,” ong ki dkhot ka AEJCA-JAC.
Shuh shuh hapoh ki nongrim jong ka jingpyrkhing kaba biang bad ka jingpyntreikam jong ki lad ba la pynbeit kumba la ithuh da ki bor pyniaid, ka jingpyntreikam ka dei ruh ban pyrkhat ïa ka jinglong jingman jong ka ioh ka kot jong ki nongshim bynta bad ki jingshisha ha ka thaiñ.
“Nalor ki jingeh ha ka liang ka aiñ, mynta ngi iakynduh ïa ka jingduna kaba jur bha ha ki lad kamai kajih jong ki kali kamai hapoh ka district naduh ka ka jinghiar ka kam ba ïadei bad ka kamai kajih bad ka kam jngohkai ki don ha ka jingshah ktah kaba jur bad kiba bun ki nongñiah kali kamai ki mad jingeh ban ban pyndap pynbiang ïa ki jingdonkam jong ki bad Ka jingpynlut ba iadei bad ka jingpyndait ïa ki kot VLTD, ka jingmaramot bad kiwei pat ki bynta namar kata kan long kaba shem shitom na ka bynta jong ngi,” la pynpaw ka AEJCA-JAC ha ka shithi sha u myntri ka sorkar jylla.