Nga lah ban shongthait na ka KSU hynrei ka KSU kan ym lah ban shongthait ha nga : Lambokstar

Shillong, Jymmang 10: U samla Lambokstar Marngar uba dei u President ba la shong noh jong ka seng ki samla pule Khasi Student Union (KSU) u la kyntait bad ong ba um don jingtip eiei halor jingshah tyrwa jong u ha kawei na ki seng sain pyrthei ka jylla ban ïakhun ïa ka election ha u snem 2028.
Katkum ka khubor hamsaïa la ong ba kawei na ki seng sain pyrthei ka jylla kila tyrwa ïa u samla Lambokstar Marngar ban long u kyrtong jong ka seng ban ïakhun ha ka election u snem 2028 na Nongstoin Constituency
Haba ïa kren bad u Mawphor u samla Lambokstar u la ong, “haduh mynta ka sngi ngin dang ïai pyntyllun ïa ki kam jong ka KSU hi bad haduh ba la aiti kyrpang ruh sha kine ki samla kiba la shimti thymmai ngin ïai don ryngkat beit ha syndah, bad ïa kata ka jylli sain pyrthei ngam pat don jingtip eiei”.
Kumba nga la kren nyngkong ba ngan ïai shakri bad pyrsat mynsiem ïa ki para samla ba kin ïakit ïa ka lyngkor lyngba ka KSU ban shakri ïa ka jaitbynriew,ong u samla Lambokstar.
Haba kylli lada don ne em ka jingthmu ban rung ha ka kam sain pyrthei, u samla Lambokstar u la ong, “Kumba nga la ong ngan ïai kyrtiang dien ïa ki 28 tylli ki snem bad tengteng nga sngewbynniaw bad sngewbynnud ba ngi hap ban shongthait noh na ka KSU, hynrep phi sngewthuh hi ka jingshakri ïa ka KSU ka por ka don ban hap shong namar ka rta kala nangiaid sha khmat, hynrei ïa kaei ban hap ïaid lynti hadien ngan ym pat lah ban batai hynrei ngi hap ban peit sa ka lyngkor ha ïing ha sem” u la ong.
Haba kren halor ka jingshongthait noh na ka KSU, u samla Lombokstar u la ong, ha u snem 1998 nga la rung nyngkong eh ha ka KSU bad haba pyrshang ban phai dien ne niew ïa kita ki snem nga sngewba lah 28 tylli ki snem lah tyllun ban noh u synniang barit jong la jong.
“Ki jingthmu ym lah ban batai lypa namar ka jingthmu jong u briew bad ka jingpyniaid uba najrong ka long la ka jong, te kano kano ka sien jam haba ïaid ha ngi ki briew ngi don la jong ka jong ka jingthmu hynrei ia kaei ka jingthmu jong u Blei ngi hap ban ap ïa kata ka por” ong u samla Lambokstar.
Shuh shuh u la ong, “Ngam shym la don shuh ha ka KSU ne nga la shongthait na ka KSU hynrei ka KSU kan ym shongthait ha nga bad ngan ïai don ha syndah bad kane ka kynhun ba thymmai, ngin ïa ai mynsiem bad pyrsat mynsiem ïa ki ba kin nang lah ban trei kham bha shuh shuh khamtam eh ïa ki mat bapher bapher kumba ka seng ha kine ki sawphew phra tylli ki snem kiba ju kren na ka por sha ka por ia ka jingbit jingbiang bad ki issue bapher bapher ban ïada ïa ka ri bad jaitbynriew”.
U samla Lambokstar u la ong, Ha kine ki khyndai snem kynthih kum ka kynhun jong ka seng bad ka CEC baroh kawei ngi kyrsiew thiah ïa la ki jong ki para samla ba kin ïa mih sha khmat ban ïa tynrong lem bad bteng ia ka jingialeh, hooid ki mat bapher bapher ngi la pynsngew sha ka sorkar hynrei ngi sngewthuh ba ki mat ba ka seng ka ju pynsngew kidei ngim dei ban rai na ka KSU, hynrei kita kiba bat ïa ka synshar khaddar kidei ma ki ban rai.
“Kum ka seng, nangne sha khmat kan dang ïai bteng ban tyllun bad kren ïa ki mat kiba dei shisha kita ki ban long doh long snam na ka bynta ka jingshong shngain jong ka ri bad ka jaitbynriew” ong u samla Lambokstar.