Nongstoiñ, Jymmang 10:Ka kur Myrthong ka dei kawei na ki kur kaba don ha rilum Khasi bad Jaiñtia kaba la don la ka jong ka sengkur kaba la seng naduh u snem 2001 bad ka la kynjoh mynta arphewsan tylli ki snem naduh ba la seng ïa ka.
Kumta ha ka sngi saitjaiñ ka 9 tarik Jymmang ka Kur Myrthong Marthong ka la pynlong ïa ka jingïalang ban plie ïa ka jingsdang jong ka jingrakhe ïa ka Jubilli ksiar jong ka jingdap arphewsan snem naduh ba la seng ïa ka.
Ïa katei ka jingïalang la pynlong ha Bishop hall New Nongstoiñ ha kaba la pynïaid da u babu G.Ningstar Myrthong ha ka jingïadon lang jong u bah Planwell Myrthong president jong ka kur Myrthong West Khasi hills district ki rangbah kur kiba bad ki nongkitkam jong ka kur Myrthong sengkmie ki dkhot bad ki nongkitkam na ki shnat trei kam ba kynthup na East Khasi hills, West Khasi hills, Eastern West Khasi hills, South West Khasi hills ryngkat ki longkmie.
Ha katei ka sngi la plie ïa katei ka jingrakhe ïa ka jubilli rupa jong ka jingdap arphewsan snem jong ka dorbar kur Myrthong da u bah W.Tony Lyngdoh Chife Excecutive Member jong ka Khasi Hills Autonomous District Council uba long u kongsan ha ryngkat ka jingïadon lang jong u bah B.Syiem uba la wan ban mihkhmat ïa u syiem ka hima Nongstoiñ uba la shah khot kum u symbud kongsan.
Ha katei ka sngi la ïoh ban pynsgew ïa ki mat trei kam jong ka dorbar kur bad la pynkup burom ruh ïa ki nongkitkam jong ka kur na ki shnat trei kam kiba don ha kylleng ki bynta jong ka district bad kiwei kiwei.
Ha kajuh ka por la ïoh ïa ka jingkren na ki ba nongshahkhot sngewbha kata na u bah Jursistman Ïawphniaw MDC ka Nongstoiñ, u bah B.Syiem na ka ophis jong ka hima Nongstoiñ bad khatduh eh la ïoh ïa ka jingkren na u bah W.Tony Lyngdoh Chiefe Excecutive Memeber ka Khasi Hills Autonomous District Council uba long u kongsan.
U bah Lyngdoh haba kren kum u kongsan ha katei ka sngi u la ong ba ka jingthaw ïa ki seng kur ka long kaba donkam haduh katta katta na ka bynta ban tehsong ïa ka jingïalong kawei ha baroh ki bynta khamtam eh ka ka imlang shalang bad ka por ba ki don ki jingeh hapoh ka kur ka jait.
Ha kajuh ka por u la ong ba ka jingïohi jngai jong ki long Kñi ban thaw ïa ka sengkur arphewsan snem mynshuwa ka dei kaba eh than namar ba ki hap ban lum bad khot lang ïa ki rangbah na kylleng ki jaka ban saiñdur na kabynta ka jingbha jong ka lawei jong ki khun ki kti hapoh jong ka kur ka jait.
Nalor kata u la ong ruh ba kat kum ka jingïaid ka por ki samla ha kine ki sngi ki dei kiba la kham kiew ha ka jingnag jingstad bad ka jingtip hynrei ki dei pat ban burom ïa ki long Kñi kiba la rangbah bad kiba la kham tymen namar ba dei lyngba ka jingbtin lynti jong ki ba ka kur ka jait ka don hapdeng jong ka jing ïatylli.
