Shillong, Jymmang 08 : Ka Department of Pathology jong ka North Eastern Indira Gandhi Regional Institute of Health and Medical Sciences (NEIGRIHMS), Shillong, ka la ïoh ban khur ïa ka kyrdan kaba nyngkong bad kaba ar na ka bynta ki kam wad bniah ha ka jingïakob jong ka lympung 7th South Asian Academy of Cytopathology and Histopathology Conference kaba long ha Paro, Bhutan, naduh ka 21tarik Ïaiong – 23 tarik mynta u snem.
U Dr. Biswajit Dey, Associate Professor, Department of Pathology, u la ïoh ban khur ïa ka khusnam ba nyngkong ha ka thup Oral Paper Presentation na ka bynta ka jingwad bniah jong u halor ka phang “Clinicopathological profile and molecular classification of muscle invasive bladder cancer based on a simplified panel of immunohistochemistry.”
Katba u Dr Naveen Kumar, Assistant Professor, ka tnat Pathology, u la ïoh ïa ka khusnam kaba ar ha kane kajuh ka kyrdan na ka bynta ka jingwad bniah jong u halor ka phang “Molecular profiling and clinicopathological association of endometrial carcinomas presenting at a tertiary care institute of Northeast India.”
Haba ai khublei ïa ki nongjop, na ka liang u Director ka ka NEIGRIHMS u Prof Nalin Mehta u la ong ba ki jingjop jong ki ha ka lympung jong ka pyrthei ka pynpaw ïa ka jinglah jong katei ka jaka sumar ban pyntreikam da ka juk stad kaba la nang kiew mynta haba ïadei bad ka jingpang cancer.
Katba ki nongjop pat ki la pynpaw ïa ka jingsngewnguh ïa u Sr Prof Vandana Raphael, HOD, ka tnat Pathology, na ka bynta ka jingïalam, jingai mynsiem bad ka jingai jingkyrshan ha ka jingwad bniah kaba la pynlah ïa ki ban khur ïa kitei ki jingjop kiba donburom na katei ka lympungbah.
