Pat rai ei ei ka NPP na ka bynta ka shuki MP Rajya Sabha, yn kren haduh ban da kut ka samoi

Shillong, Jymmang 8 : U Symbud Myntri Rangbah bad National Vice President ka National People’s Party (NPP) u Ma Sniawbhalang Dhar ha ka sngi Thohdieng, ula ong ba ka party kam pat shim rai ïa u kyrtong na ka bynta ka shuki MP Rajya Sabha, hapdeng ka jingnang sawa ka sur jingkyrshan ha ri-lum Garo ïa u Myntri barim u James PK Sangma.
Haba jubab ïa ka jingkylli, u Ma Dhar ula ong ba kam don jingeh ïa ka jingpynpaw kyrteng, hynrei ula pynshai ba ka party kan sa ïakren bniah ïa kane ka kam hadien ba kut ka samoi treikam u MP ba mynta.
“Ngin dang ban shim ïa ka rai. Ai ba ka samoi jong u kan kut shuwa bad ngin sa ïa shong kum ka party” ong u Ma Sniawbha haba thew sha u MP ka Rajya Sabha ba mynta Dr WR Kharlukhi. “Nga tharai ka samoi treikam jong u kan kut ha u bnai Jylliew hynrei ngam pat thikna bha”.
U Dr Kharluki ula shah jied kum u MP ka Rajya Sabha ha u bnai Jylliew 2020. Ka samoi treikam u MP Rajya Sabha ka long hynriew snem.
Haba kylli la ka jingjied kyrteng ka dei ban leit sha u Nongïalam na kano kano ka thaiñ, u Ma Sniawbha ula kyntait ïa kane ka jingthmu ban ïapyrkhat da ka thaiñ.
“Ngim ju ïapyrkhat da ka thaiñ” ula ong haba bynrap “Kaei kaba ka party ka sngew ïahap ngin ïaid da kata namar ka dei ka rai jong baroh lang ym ka rai jong uwei u briew”.