Shillong, Jymmang 07 : Ka State Level Census Coordinating Committee (SLCCC) ka la pynlong ïa ka jinghikai kaba shisngi ha ka 07 tarik mynta u bnai na ka bynta ban pynkhreh ïa ka jinglum khanasamari ha ka kylla kaba nyngkong, kata ka Houselisting Operations (HLO) jong ka Khanasumari 2027, kaba la buh ban sdang naduh ka 16 tarik Jymmang, 2026
Ha kane ka jingïalang ba la pynlong da ka General Administration (H) la wan ïashim bynta da ki dkhot jong ka SLCCC kiba kynthup ïa ki Deputy Commissioner bad Principal Census Officer, ki District Census Officer, bad ki ophisar na ki tnad bapher bapher.
Na ka liang u Bah FR Kharkongor, Principal Secretary haba kren kum u Kongsan u la ban jur ïa ka jingdonkam jong ka jinglum khanasamari ha ka Jylla kum ka jingtreikam kaba kongsankaban ai ïa ki jingtip ba thikna na ka khanasamari.
U ong ruh ba kane kan pynlah ïa ka sorkar ban tip ïa ka jinglong jingman kaba ïadei bad ka jingdon ki nongshong shnong katkum ka jaka bad kumjuh ha ïoh ka kot jong ki khamtam na ka bynta ka jingdonkam ha ka roi ka pa ha kylleng ki bynta jong ka jylla.
Ha kajuh ka por u la banjur ïa ka jingdonkam jong ka jingsnohkti lang jong ki paidbah nongshong shnong bad ki jaka treikam bapher bapher na kabynta ban wanrah ïa ka jinglum khanasamari kaba paka bad kaba ïaid beit ïaid ryntih.
U Kongsan u la ong ruh ba kane ka dei ka sien kaba nyngkong ba kin lum khanasamari da ki kor ki bor ne ka digital census. Kumta u la kyntu ruh ïa ki paidbah ba kin shim bynta ha ka jingpyrung kyrteng hi dalade ïalade.
Ha kane ka sngi la ïoh ruh ïa ka jingkren na ka Dr Pooja Pandey, Commissioner & Secretary bad State Nodal Officer for Census, Biswajit Bora, Director, Census Operations bad kiwei kiwei. Katba na ka liang u Swapnil Tembe, Secretary & Additional State Nodal Officer, u la kyntu ïa ki Principal Census Officer bad ki District Census Officers ba kin shim ïa ka jingtrei lang jong ki Rangbah Shnong kumjuh ki Nokma na ka bynta ka jingïaid beit ïaid ryntih ka jinglum khanasamari.
