Shillong, Jymmang 08: Ka Mishon SSCC ka la pynskhem ïa ka jaka ba khatduh ha ka wat ïakhun pre-quarterfinal jong ka lympung 5th Meghalaya State League da ka jingjop kaba 5-2 kol pyrshah ïa ka Lawbah SC ha ka Group F ha Mairang hynne ka sngi Thohdieng.
Ha kawei pat ka jingïalehkai la sakhi ïa ka Shillong Lajong FC kaba la pynjemkhnap ïa ka Lumphyrnai Sohphoh FC da 5-0 kol ha Wahiajer ha ka Group E.
Haba phai sha ka jingïakhun jong ka Group F, ka Lawbah ka donkam ban jop da ka jingkheiñ kaba heh ban knieh ïa ka kyrdan ba ar na ka Mishon, hynrei ha ka jingïalehkai dei ka Mishon kaba la ïoh ïa ka jingsdang kaba paka da kaba pynkhihjar lai sien ha ka kylla step. Kine ki kol ki la wan lyngba u Rekybart Ryntathiang (18’), u Lawanphrang Kurbah (26’) bad u Banshimborlang Ryntathiang (29’).
Ka kylla miet ka la kham ïaryngkat bor ha kaba baroh arliang ki la ïoh ban thep mar ar kol. Ka Lawbah ka la pynkhihjar lyngba u Mebadonbor Shangpliang (62’) bad u Adonydevy Riwan (80’) katba ka Mishon ka la thep lyngba u Lawanphrang L Mawnai (66’) bad u Stevenmark L Kynshi (82’).
Ha Wahiajer, ka Lajong kaba dei ka lahduh jong u snem 2019, ka la ïoh ban thep ïa baroh san tylli ki kol ha ka kylla miet lyngba u Colinsalmon Lyngdoh (59’, 82’, 87’) uba la thep hat trik, u Badondor Marbaniang (51’) bad u Donboklang Kharjana (80’).
Baroh ar liang, ka SLFC bad ka Lumphyrnai ki la dep ban pynthikna ïa ka jaka jong ki ha ka kyrdan ba nyngkong bad ba ar shuwa kane ka jingïalehkai hynne ka sngi.
Ka Lajong kan khreh ban aireng pyrshah ïa ka Mission ha ka Pre-QuarterFinal, ha kaba ka Umphyrnai kan ïakhun pyrshah ïa ka Langsning kaba la ïalam hakhmat ha ka Group F.
Mynta ka sngi yn sakhi ïa ka jingïalehkai kaba khatduh na ki 104 tylli ki jingïalehkai Group stage bad kan long ha ka Group G hapdeng ka Balmanduri FC pyrshah ïa ka Janepih YSCA ha ka por 3 baje nohphai sngi ha Williamnagar.
