Nalor ka jingpule, hikai ka JEC Khliehriat ïa ki samla ba kin nang ruh kumno ban kyntiew ïa ka ïoh ka kot

Khliehriat, Jymmang 02 : Ka Jaiñtia Eastern College Khliehriat, East Jaiñtia Hills District, ka dei ka college kaba la seng ha u snem 1992, ka dei ka shlem ai jingnang jingstad kaba ai ïa ka jingshakri kaba radbah ïa ka thaiñ East Jaiñtia Hills District ha kaba kyntiew ïa ka jingnang jingstad bad ha kajuh ka por ki bor pyniaid jong ka college ba la lam khmat da u Principal, u Dr Phervision Nongtdu ki shim ïa ki synjam ban bsut hapoh ki jingmut jingpyrkhat jong ki samla pule halor kumno ban kyntiew ïa ka imlang ka sahlang, ban kyntiew ïa ka bha ka miat, kyntiew ïa ka khaïi ka pateng, ka ioh ka kot, kumjuh ruh ban ieid ïa ka mei mariang.
Ka Jaiñtia Eastern College ka la shim ïa ki synjam ban kyntiew ïa ki samla pule da kaba thaw ïa centre ki ba ai jinghikai kum ka DIKSHA Beauty Care kaba la kyrshan lang da ka Dalmia Bharat Company bad bun ngut ki samla ki la lah ban pyndep ïa kane ka jingshah hikai napoh kane ka centre kaba na college bad ki samla pule ki la lah ruh ban thaw ïa ki lad kamai bad ki la lah bad don jingtip ha ki kam ba ïadei bad ki dukan pyn bhabriew lane ki Beauty Parlour.
Shuh shuh ka College ka la thaw ruh ki shlem ai jinghikai ha ki kam electrical work kumba kaba ai jinghikai ha ka electrical wiring bad bun ki samla pule ki la lah ban leh ïa kane ka kam hadien ba ki la pyndep ia ka jingshah hikai, kane ka Entrepreneurship Cell (E-Cell) jong ka Jaiñtia Eastern College,Khliehriat ka la shim ïa ka jingiatreilang bad ka PRIME Meghalaya kumjuh ruh bad ka MBMA, la dep ruh ban pynlong ïa ki prokram ai jinghikai ba 30 sngi ba la tip kum ka Assistant Electrician cum Entrepreneurship in Electrical Wiring ha kaba la pynkut ïa ka prokram ha 2 tarik u rymphang 2026 ha Green Valliey Industries Limited, Nongsning ha kaba la sam ïa ki syrnot sha kiba la pyndep ïa ka jingshah hikai, ïa ka ka bynta ba ïadei bad ka jingleit sha karkhana ne industrial visit la pyniaid da u M. V. Rao, GM (Process), Green Valliey Industries Limited uba la ai ruh ka jingkren.
Dang shen, kata myn ha ka 14 tarik u bnai iaiong, ka college ka pynlong ruh ïa kawei ka prokram kaba kham pher bad kham kyrpang kaba ïadei bad ka jingpyrshang bad twad buit na ki samla pule kiba na ri lum Jaiñtia ha kaba ïadei bad ka bynta ba kumno yn kyntiew ïa ka khaïi ka pateng ha East Jaiñtia Hills District, ïa kane ka prokram la tip kum ka Ideathon/Hackathon 2026 , – Innovating for Sustainable Development in East Jaiñtia Hills bad ha kane ka prokram ka college ka la ioh ïa ka jingkyrshan kaba radbah na ka PRIME Meghalaya ha kaba la ïa don ryngkat lang ruh u Functional Manager, District Commerce and Industries Centre, Khliehriat, u bah G.Pala, ki nongtrei kiba na ka tnat PRIME Meghalaya ba kynthup ka kong Merika Suting bad u bah Damangbhaki Wann bad la sakhi lang ruh da u Dr. Becare Me O Nongtdu, uba dei u Principal jong ka Dkhiah East Secondary School kum u kongsan.
Ha kane ka Ideathon/Hackathon 2026, ki la don haduh khatar tylli ki khynhun jong ki samla pule kiba na ri lum Jaiñtia kiba la mih rynsan bad ai jingkren bad pyni ïa la ki jong ki nongrim kiba ïadei bad ki jingiohi jong ki halor ka bynta kumno ban sdang ne ban leh ïa ki kam khaïi pateng, ban ieng hala ki jong ki kjat, ki samla pule kiba la wan ban iashimbynta ki dei kiba na KiangNangbah Government College, Jowai, Jaintia Eastern College, Khliehriat, Thomas Jones Synod College, Jowai, Don Bosco College, Byndihati, East Jaintia Hills District, Nongtalang College, West Jaintia Hills District, ia ka prokram la pyniaid da u Prof. Banpynskhembha Papang, uba bat kum u SPOC, E-Cell, Jaintia Eastern College, Khliehriat.
U Dr. P. Nongtdu u la ong ba nalor ki jingstad jintip ba ki samla ki ioh na ki shlem pule ne ki college ka long kaba donkam ruh ban pynrung hapoh ki college ïa ki shnat lane ki center bapher bapher ki ban ai jinghikai ïa ki samla bad ba ki centre kin kylla long ruh kum ka jingplie lad ïa ki samla pule ban thaw ïa ki lad kamai ba kin nym long kita ki samla kiba khlem kam khlem jam.
Na ka liang u bah Damangbhaki Wann, uba na PRIME, u la long ruh kum u Resource Person bad haba kren ha ka jingialang u la batai bad pynshai ïa ki bynta bad ki jingthmu jong ka PRIME Meghalaya halor kumno ban kyntiew ïa ki samla ha ki kam bad ïadei bad ka khaïi pateng, u la ong ruh ba ka PRIME ka lah ruh ban ai jingkyrshan da ka pisa, ka jinglam lynti bad jingkhmih bniah (mentorship) ïa ka jinglah ki samla ha ka kam khaïi, u la pynshlur bad ai mynsiem ïa ki samla pule ba kin mih shakhmat ban sdang ïa ki kam ha ka khaïi pateng, u pynshlur ruh ba kin shim ïa kane ka rynsan Ideathon/Hackathon kum ka rynsan ka ban ai buit, ai jingtip halor kumno ban pynlong ïa ki kam khaïi pateng kiba jop bad ba seisoh.
Ha kane ka prokram Ideathon/Hackathon la iohi bad lap ba ki phang ban kyntiew ki kynthup ruh haloe kumno ban kyntiew bad ban kamai na ki kam jngohkai pyrthei, na ka rep ka riang kum kaba thaw ïa ki Agriculture & Food Processing, ban thaw ki lad kamai pisa lyngba ki technology kum ka Digital Solutions for Rural Development, la batai bad pynshai ruh halor ka Waste Management & Environment, Innovation in Electrical Systems bad kiwei kiwei.
Ki samla pule kiba na kitei ki college na ri lum Jaiñtia ki la batai shai halor kumno ban sdang ïa ka kam ban long kum ka lad kamai kaba long katkum ka jingiohi jong ki bad kane ka jingkiew rynsan jong ki ruh ka long shibynta kum ka jingiakop pyni buit ha ki kam ba ïadei bad ki lad kamai ne ka khaïi ka pateng da kaba pyndonkam da ki mar kiba lah ban ioh napoh ka thaiñ hi. Ha ka jingiakop, ka Kiangnangbah Government College Jowai ka la rah ia ka nam lahduh ha ka 1st Prize bad ioh khur ïa ka khung pisa kaba T150000 hajar tyngka (khatsan hajar tyngka) bad la ïa shimbynta da u samla Arwandao Dkhar, Noel Darnei, bad u Odawanlangki Sutnga.
Ka Thomas Jones Synod College, ka la jop ha ka kyrdan ba ar ne 2nd prize bad khur ïa ka pisa kaba T10000 hajar tyngka (Shiphew hajar tyngka bad la ia shim bynta da u Samanlangki Suchiang, Heibhahmi Suchen, ka Agatha Jongte, Dashailin Nongshli.
Ka Nongtalang College, ka wan ha ka kyrdan ba lai bad ioh khur ïa ka pisa kaba T5000 hajar (San hajar) tyngka bad la ia shimbynta da ka samla Phibakor L Gadew, Bismo Patro, Snehashish Bhattacharjee, Finance Bareh bad Mimom Das.
U Prof. Banpynskhembha Papang u la ong ba kane ka rynsan Ideathon/Hackathon 2026 ka dei shisha ka rynsan kaba biang bha na ka bynta ki samla pule ha kaba ki ioh ïa ka lad kaba paka ba kin pyni sha ka pyrthei ïa kata ka jingring dur jong ki ha ki jingmut jingpyrkhat halor kumno ban leh ne sdang ïa ka khaïi ka pateng, ki ioh jingmut ruh ïa ki kam ki jam ha ka khaïi ka pateng bad kane ka rynsan ka thep ruh hapoh ka jingmut jingpyrkhat jong ki samla pule ïa kiei kiei kiba ïadei bad ki lad kamai ba kin long kita ki nong khaïi kiba kiew shakhmat ha ryngkat ka jingnang jingstad.