Leit khroh ki nongïalam NPP ban ïakhun noh kum u kyrtong ka seng ha ka elekshon MP Shiteng samoi

Shillong, Jymmang 02 : Ki nongïalam jong ka National People’s Party (NPP) ki la leit ban khroh ïa u nonghikai ha skulbah NEHU ba dei ruh u President jong ka Khasi Authors Society (KAS) ba un wan ban ïakhun noh kum u kyrtong ka party ha ka elekshon MP shiteng samoi jong ka Shillong Seat kaba la khmih lynti ba kan sa long noh ha ki khyndiat bnai ban wan.
Kane ka kynhun hapoh ka jingïalam jong u Working President, Bah Hamlet Dohling kaba kynthup lang ïa baroh ki District President na baroh ki district ba hap ha Khasi – Jaintia, ha ka miet sngi Thohdieng ki la leit lang khrui ha iing sah jong u Dr. Nonglait ban leit kynduh markhmat ïa u bad ban pynsngew ha u halor kane ka jingtyrwa.
Na ka liang u Bah Hamlet Dohling haba kren bad ki lad pathai khubor hadien ba la dep ïa kynduh ïa u Dr. Nonglait u la ïathuh ba kane ka jingwan jong ki ka dei da ka jingbthah jong ki nongïalam ba ha khlieh duh jong ka party, ba kynthup naduh u Conrad K. Sangma, Bah Prestone Tynsong bad kumjuh u Bah Sniawbhalang Dhar.
“Na ka liang ka party, ngi la don kumba saw san ngut ki riew rangbah ïa kiba ngi la ïa kren ba kin long ki kyrtong na bynta kane ka elekshon shiteng samoi. Kumta napdeng ki san ngut, ka kyrteng kaba nyngkong kaba shah jingmut ka dei ka kyrteng i Dr. DRL Nonglait,” u la ong.
Shuh shuh u la ïathuh ba shwa ba kin leit sha iing jong u Dr. Nonglait, ka la don ka jingpynbor na ki nongïalam jong ka party na baroh ki 7 tylli ki distrik ba lada ki nongïalam ha ka jylla ki pdiang ki kwah ba nyngkong dei ban tyrwa da ka kyrteng u Dr. DRL Nonglait.
“Kum ka party kaba sngap lang ïa ka jingai jingmut jong ki nongïalam na ki block bad na ki district kumta baroh ki president bad ki secretary jong baroh 7 tylli ki district ngi wan lang ha iing i Dr. Nonglait ban ïakren bad i,” u la bynrap shuh shuh.
U Bah Hamlet u la ïathuh ba ha ka jingkynduh bad u Dr. Nonglait baroh ki nongïalam na ki distrik ki la ieng ban kyrpad ïa u ba un pdiang ïa ka jingkyrpad jong ki ban long u kyrtong na ka bynta ka party ha kane ka elekshon shiteng samoi.
“Kaba sngewtynnad ka long ba ki nongïalam na baroh ki distrik ki da kular ruh ba kin trei shitom ban ïoh ïa ka jingjop ha kane ka elekshon MP shiteng samoi.”
Haba jubab pat ba kaei ka jingkular kaba u Dr. Nonglait u ai, na ka lïang u Bah Hamlet u la ïathuh ba une u rangbah mynta mynta u la pynpaw ba um pat lah ban ai ïa ka rai. “Na ka liang ka party ngi sngewthuh ïa kata hynrei ngi kyrpad pat ba in ai kham kloi ïa ka jubab namar kumba phi sngewthuh kane ka dei k a elekshon shiteng samoi bad ngim tip lano ka elekshon kan wan. Kumta ngi la kyrpad ïa i ban ai kham kloi ïa ka jubab bad na ka party hi baroh kawei ngin ap shwa ïa ka jubab na ka liang jong i Dr. Nonglait.”
Nalorkata, u la ong ruh ba na ka liang ka party ka ïai ban biang ba u Dr. Nonglait kum u briew uba donburom, uba shemphang bad don ka rynieng ka ryniot, kumta ki da thrang eh ba un long u kyrtong jong ka party ha kane ka elekshon MP shiteng samoi.