Hadien u Purno, dei sa u Conrad ba wan ïuhkjat ha shnong Madanryting

Shillong, Jymmang 02: U Myntri Rangbah ka jylla u Conrad K Sangma u la pynpaw ka jingkmen ba khraw ba u kylla long u Myntri Rangbah ba-ar jong ka jylla Meghalaya ban wan ïuh kjat hapoh ka shnong Madanriting, hadien jong u (L) Purno A Sangma.
Ïa kane u Conrad K Sangma u la pynpaw ha ka jingïalang ban pyllait paidbah ïa ka kali kit nongpang (ambulance) bad ruh ïa ka kali kit metïap (mortuary van) bad ka jingpyn kup burom ïa ki tymmen ki kro nalor kiwei pat hapoh ka shnong Madanriting, ïa kaba la pynlong ha St. Peter’s Secondary School.
Ha kane ka sngi u myntri rangbah ka jylla u la pyllait paidbah ruh ïa ka Ambulance bad ïa ka kali kit met iap jong ka Dorbar Shnong.Ha kane ka prokram la ai khublei ïa ki samla pule kiba la pass bha, ki riew ba ïakhun pyrshah ïa ka khlam covid, ki pulit, ki nongtrei ba pynphuid ïa ka shnong ka thaw, ki nongtrei ASHA, ki nongjop ha ka jingïalehkai bapher bapher bad ki rangbah bad ki longkmie kiba la heh ka rta jong ka shnong.
Haba kren ha ka jingialang u Conrad K Sangma u la pynpaw ba ynda u la poi hapoh jong kane ka skul St. Peter’s, u la ioh jingtip ba u (L) Purno A Sangma mynba u dang dei u Myntri Rangbah ka jylla u la wan nyngkong eh kum u Myntri Rangbah ka jylla ha kane hi ka skul ha Madanriting.
“Nga ju ngeit ba kino kino ki dak ki shin kiba rit barabor ki long kiba kit jingmut bha bad kane ka jingpynbeit jong ka dorbar shnong Madanriting ban pynkup burom ïa ki riew tymmen kiba la 80 snem shaneng bad la don ruh iwei i longkmie iba dang shu dep ban rakhe ïa ka jingdap 100 snem, nga da ktah shisha hapoh ka mynsiem” ong u Conrad.
“Ka long kaba pynkmen shibun ban ïohi ba ka Dorbar Shnong ka la pynbiang ïa kine ki jingdonkam kiba kongsan na ka bynta ka shnong ki ban pynsuk ban kit ïa kiba pang ne kiba mynsaw bad ka jingkit kaba shngain bad kaba don burom ïa kiba la khlad noh,” u la ong.
Shuh shuh u la bynrap ba ka long kaba kongsan ban ai burom bad ban pyni ïa ka jingsngewnguh da kaba bynrap, “Ka kam kaba ngi leh ne ki jingjop ha ka jingim jong ngi kam ju long kaba rit ne kaba heh than hynrei ka jingsngewnguh ka lah ban wanrah ïa ka jingkylla kaba khraw,” bad pynpaw ba ka prokram pynkup burom na ka bynta ki briew na baroh ki liang ka long shisha kaba dei ban ïaroh.
Halor ki katto katne ki jingeh bad jingsngewkhia ba la pynpaw da ka Dorbar Shnong ha ka dorkhas ba la ai ha u, u Myntri Rangbah ka Jylla u la kular ban pynbha, pynthymmai bad shna ïa ki jingdonkam ba kongsan na ka bynta ka madan ïalehkai ha shnong Mandanriting bad ka kynroh ban pynskhem ïa ka community hall. U la pynthikna ruh ban don ki light surok bad ki CCTV na ka bynta ka thain hapoh ka My City Campaign.U la bynrap shuh shuh ba yn sa bishar bniah ia kiwei pat ki jingeh jong ka shnong.
U la ai ruh ïa ka jingïarap pisa kaba T.2 lak na ka Chief Minister’s Special Grant sha ki skul kiba la ïa shim bynta ban pyni ïa ki sap ki phong ha ki jingshad kiba pyni ïa ka kolshor jong ka jylla bad ka rwai ka siaw.
U Bah Lambor haba kren kum u symbud kongsan u la ong, Ka jingkhot ïa u Myntri Rangbah hapoh ka shnong Madanriting ym dei ba kin dawa eiei, hynrei ngi pynsngew bad kyrpad ha u Myntri Rangbah.
Haba pynsngew halor ka jingdonkam ki khun samla u Bah Lambor u la ong ba lada ym don ki jaka ban ïalehkai, ka rung noh ha ka jingmut ka jingpyrkhat ka jong ki da kiba sniew.
Shuh shuh u Bah Lambor u la ong ka umbam umdih kadei kawei ka jingeh bad u la kyrpad ruh ban kyrshan lang ïa ka shnong Madanriting da ki streetlight.
U Bah Lambor u la ai ruh ka jingiaroh ba hapoh ka jingialam u Conrad K Sangma kum u Myntri Rangbah ka jylla, kala long shisha ka jingjop namar ïa ka ktien Khasi bad Garo la kylla long ka ktien sorkar hapoh ka jylla bad khmih lynti ba shen kan sa rung noh ha ka kyrnit ba phra jong ka riti synshar ka ri
Ha kane ka sngi la ïa don lang ryngkat ka Wansuk Syiem, kaba dei ka MP barim Rajya Sabha, ki dkhot bad ki nongkit kam ka Dorbar Shnong, Madanriting, ki paidbah nong shong shnong, ki khynnah skul lem bad ki nonghikai.