Kynthup ki kmie ki kpa pynkup buromlang u Bah Sanbor ïa ki nonghikai baroh

Shillong, Jymmang 02 : U MLA ka South Shillong constituency uba dei ruh u Myntri Sorkar Jylla, u Bah Sanbor Shullai ha ka sngi Saitjain u la pynkup burom kyrpang ïa u Wangaal Lama uba la ïoh ïa ka kyrdan ba nyngkong duh hapoh ka Top 20 jong ka result Secondary School Leaving Certificate jong ka MBOSE kaba dang shu pynbna shen ha u bnai ba la dep.
Lah ban kdew hangne ba une u samla na ka skul Gorkha Pathshala Hogher Secondary School u la ïoh haduh 585 mark ha ka result MBOSE kaba la pynlong mynta u snem ban ïoh bat ïa ka kyrdan kaba nyngkong duh ha ka SSLC mynta u snem.
Kumta na ka liang u Bah Sanbor haba kren ha ka jingïalang u la ong, “Nga dap da ka jingkmen kaba khraw ba u samla ba wan na ka longiing kaba duk na ka constituency jongnga u ïoh ban knieh ïa ka kyrdan kaba nyngkong eh ha ka result SSLC jong ka MBOSE ha ka jylla baroh kawei.”
U MLA u la ai burom ruh ïa ki kmie ki kpa jong u Lama, bad kumjuh ïa ki nonghikai kiba la lah ban saiñdur ïa ka pule puthi. Ha kane ka sngi u MLA u la pynkup burom ruh ïa 44 ngut ki nonghikai la skul Gorkha Pathshala kynthup ïa u Principal ha ka jingïalang ba la pynlong ha State Convention Centre, Shillong.
Haba kren pat halor ka jingpynkup burom lang ïa baroh ki nonghikai jong ka skul kynthup naduh u Principal bad kumjuh ki kmie ki kpa jong u Wangaal, u Bah Sanbor u ong, “Kane ka long kum ka jingithuh ïa ka jingaiti met bad mynsiem jong ki kaba pynlong ïa ka skul ba kan lah ban sei ïa u khynnah uban knieh ïa ka kyrdan kaba nyngkong napdeng ki spah bad ki hajar tylli ki skul ba ïakhun ïa ka SSLC mynta u snem.”
Lada kynthup lang naduh ki nonghikai bad ki kmie ki kpa baroh ki la poi haduh 46 ngut kiba shah pynkup burom ha kane ka jingïalang kaba la sakhi lang da ki nongïalam shnong bad ki nongkitkam jong ka Shillong South Constituency.
Haba kren ha kane ka jingïalang pynkup burom, u Wangaal u la pynpaw ka jingsngewnguh ïa u MLA bad ïa ka kynhun jong u, ha kaba u la ong ba kane ka dei ka jingpynkup burom ka ban un ym klet shuh shirta ha ka jingim jong u.
Na ka liang u Bah Sanbor ha kane ka sngi u la ai ïa ka song pisa kaba 50hajar tyngka kynthup ïa kiwei ki jingai sngewbha kiba rem dor.
Ha kajuh ka por u Principal ha ka jingkren u la ong ba ka jingpynkup burom kyrpang ïa ki nonghikai halor ka jingpass bha ka skul mynta u snem ka la pynlong ïa ki ban um ka mynsiem ryngkat ka jingkmen kaba khraw.
“Kane ka jingpynkup burom ka la pynkmen haduh katta katta ïangi baroh ki nonghikai namar ka long kum ka dak ka jingithuh ïa ka jingaiti lut bad mynsiem jong ki nonghikai ha ka kam ba ki trei. Kane kan nang ai mynsiem shuh shuh ïangi bad ïa ki nonghikai baroh ba ngin lah ban trei khambha shuh shuh nangne shakhmat,” u la ong.