Watla beiñ ki Liang Pyrshah ki nonghikai pat ki ai ka jingïaroh kaba khraw ïa ka sorkar MDA

Shillong, Jymmang 2 : Katba ki Seng Sain Pyrthei kiba don ha ka Liang Pyrshah ki kynnoh bad bein ba ka Sorkar Meghalaya Democratic Alliance (MDA) ka dei ka Sorkar ba isih Nonghikai, hynrei ka jingrwai shoh mynsiem ba la rwai shitrhem da ki spah spah ngut ki Nonghikai SSA bad Meghalaya 4th Teacher ha ka jingïalang pynkup burom ïa u Myntri Rangbah Conrad K Sangma ha madan Student ha ka Sngi Thohdieng ka pyni pat ïa kawei ka dur-kawei pat ka jingsngew bad kata ka long ba ki pynpaw ïa ka jingsngewnguh kaba khraw haduh katta katta ïa kane ka sorkar MDA ba la ïalam da u Myntri Rangbah Conrad K Sangma kaba la pyntreikam ïa ka Structured Pay Framework (SPF) ne ka jingsiew tulop ba la pynbeit ryntih na ka bynta jongki.
Kane ka jingïalang, ba la pynlong da ka Meghalaya SSA School Association (MSSASA) bad ka Meghalaya 4th Teachers Association ka dei kaba thmu ban pynkup burom ïa ka Sorkar namar ka jingpyntreikam ïa ka Structured Pay Framework (SPF) ne ka jingsiew tulop bala pynbeit ryntih, ka sienjam kaba thmu ban kyntiew ïa ka kamai kajih bad ka jingïada ïa ki kam ba ki nonghikai SSA bad 4th Teacher ki trei ha kylleng ka Jylla.
Hynrei, khlem da kheiñ ïa ki jingkren bad ki jingleh , ka jingrwai ba shna hi ha ka ktien Khasi-English da ki nonghikai ka dei kaba khring duh ha kane ka jingïalang.
Da ki spah ngut ki nonghikai kila rwai ïa kane ka jingrwai, kaba ki kyntien ki don ki ktien kiba thew sha ka jingsngewnguh ïa u Myntri Rangbah ka Jylla bad ki Myntri jong ka Sorkar MDA-I bad MDA –II.
“ Myntri Rangbah ba don burom, ki symbud myntri rangbah ba ieit eh, sir R.A Sangma, Sir Rymbui
Ngi ai ka jingïaroh ïa ki kam kiba khraw ki jong phi
Ngin ym klet ïa phi bad ngin ïai ieit ïaphi”
Kawei pat ka laiñ, “Khublei shibun eh ki myntri ba ieit eh jong ngi ba phi la ïarap ban ïoh ïa ka jingjop ha ka jingim jongngi”
“Honourable CM sir and dearest Dy. CM; Sir R.A Sangma, for you Sir Rymbui, we appreciate your act like hero. We will never forget and always love you,” rwai ki nonghikai.
Kawei pat ka laiñ ka ong : “Thank you so much dearest ministers, that you helped us to overcome in life.”
Ka jingrwai ba la rwai ka dei ka jingpynsngew ïa kaei kaba sngew shimet shimet ym kaba ïakhleh kam saiñ pyrthei. Ki jingpynpaw na ki nonghikai kiba ong ba khatduh khatwai lah don ba sngap ïa ki hadien da ki snem ka jingbymsngew thikna halor ka tulop bad ka jingshngaiñ ka kam. Ka jingrwai hynnin ka sngi ka pyni ïa ka jingbakla ïa kaei kaba ki seng saiñ pyrthei ha ka Liang Pyrshah ki pyrshang ban pyni sha ka pyrthei, ha kaba kine ki seng saiñ pyrthei kila kynnoh ïa ka Sorkar ba ïalam da u Conrad K Sangma kum ka Sorkar kaba leh bym suidniew ia ki nonghikai bad ka bym shym la leh eiei ban weng ïa ka jingeh jong ki.
Lah ban kdew ruh, u President ka Meghalaya SSA School Association Bah Aristotle Rymbai ula pynpaw dang shen ïa ka jingsngewnguh ïa ka Sorkar Jylla, khamtam ïa u Myntri Rangbah ka Jylla Conrad K Sangma, namar ka jingpynthikna ïa ka jingskhem ka kam ki nonghikai SSA bad ba pyntreikam ïa ka revised pay structure nalor ki allowance hashuwa u bnai Iaiong 2026.
Ha ka jingthoh social media ba dang shen, u Bah Aristotle ula shim ia kane ka jingtuklar jong ka Sorkar kum ka “bym lah klet shuh” bad ïaroh ïa ka jingkut jingmut ban ïada ïa ka kamai jakpoh ki nonghikai bad ban pynkhlaiñ ïa ki kam ha ka pule dangle.
U Myntri Rangbah ka Jylla Conrad K Sangma ha ka jingïalang hynnin ka sngi, ula kubur ïa ka jingeh bala mad da ki nonghikai SSA kaba la ïaid da ki snem bad ong ba ka Sorkar ka la trei khlem shongthait ban shem ïa ka jingpynbeit kaban neh shirta lyngba ka Structured Pay Framework (SPF).
“Phi la mad ïa shibun ki jingjynjar, ki jinglen lade bad jingïaleh, hynrei nga kmen ba nga lah ban don bynta ha kane ka jingïaid lynti” ula ong, haba ban jur ïa ka jingkut jingmut jong ka Sorkar ban pynthikna ba ki nonghikai ki dei ban ïoh ïa ka burom, ka jingleh hok bad ka jingbiang ka kamai kajih”.
Katba ki jingiakren ha ki rynsan social media ki dang ïai bteng ban tah dur ïa ka Sorkar kum ka nongshun ha ka kam ki nonghikai, ki nonghikai pat dalade kila ïeng ryngkat bad u Myntri Rangbah bad pynpaw paidbah ïa ka jingsngewnguh ïa ka Sorkar.
Ka jingpynkynmaw hangne ka long ba kaei ka jingïakren kaba mih ha ki rynsan social media kim mut satia ba ki dei ki jingshisha kaba la mad da ki briew kiba don bynta ha kane ka kam.