Hikai ka tnad Commerce and Industries ban shna jingdeng ksiar da ki siej ha Thyllaw

Shillong, Jymmang 1 : Ka tnad Commerce and Industries ka la pynlong ïa ka jingai jinghikai ba 15 sngi lynter ïa ki samla bad longkmie ka shnong Thyllaw kaba hap hapoh ka Mawsynram C & RD Block East Khasi Hilla na ka bynta kumno ban shna jingdeng ksiar na ki siej (Bamboo Jewellery Making). Kane ka long kum shi bynta na ka Raising and Accelerating MSME Performance (RAMP) Programme.
ïa ka prokram ban kdew bad ïatei la pynlong ha ka 1 tarik Jymmang 2026 da ka jingïatrei lang bad ka Neera Sarmah Foundation.
Ka Thyllaw ka dei ka shnong kaba itynnad bad kaba la ker sawdong da ki jingthaw bapher bapher jongka mariang khamtam eh ka long kaba riewspah bha ha ki Siej bad ka dei ruh kaba tbit bha ban shna jingshna kti da ki siej.
Ki nongthaw nongoh dur da ki siej na kane ka shnong ki la sei ban shalan ïa ki sha kiwei kiwei ki bynta ka jylla. Nalor ki siej ka riewspah ruh ha u synsar. Kane ka jingtbit jongki ban shna jingshna na ki siej ka kdew shai ba ki nongshong shnong ha kane ka jaka ki don ka jingïadei kaba jan bad ka mariang.
Ha kane ka jingai jinghikai la hikai ban shna ïa ki jingdeng ksiar bapher bapher. Da kane ka buit jingshna ba thymmai la khmih lynti ba kan dang ai jingmyntoi ïa ki nongshna bad nong ohdur ba tbit jong kane ka shnong ba kin lah ban im bad kamai jakpoh na kane ka kam.
Da kane ka jinghikai kaba thymmai khlem pep kin phai khmat ban shna ïa kine ki jingdeng ksiar ba kin ïoh ban shalan ym tang hapoh ka jylla ka ri hynrei wat shabar ka jylla ruh bad kane kan ïarap ïa ki ba kin lah ban ïeng ha la ki jong ki kjat kum ki nongsengkam lajong.
Kane ka prokram ka dei shibynta na ka jingpynshlur ban seng kam kat kum ka RAMP Programme kaba dei ka tnad jongka Micro , Small, Medium Enterprises (MSME), jongka sorkar pdeng bad kaba ju bei tyngka ruh da ka World BaNK.