Mynjur ka Star Cement ïa ki jingdawa ka JAC dang ïakhih pyrshah sa ïa ka Dalmia Cement

Shillong, Iaiong 29 : Hadien ba ka Joint Action Committee, kaba kynthup ïa ka East Jaintia Hills Truck Owner and Transporter Association bad ka Jaintia Hills Truck Owners’ Association, ka la byrngem ba kan nang pynjur shuh shuh nangne shakhmat ïa ka jingïakhih jong ka pyrshah ïa ka jingbym patiaw jong ka Star Cement bad ka Dalmia Cement halor ki mat jingdawa jong ka, bad ruh halor ka mat dawa ban pynduh pyndam noh shisyndon ïa ka jingpyndonkam jong ki kharkhana dewbilat jong ka East Jaintia Hills ïa ki bulker trok, u Deputy Commissioner jong ka East Jaintia Hills District, mynhynnin ka sngi (27.04.2026), u la khot kyrkieh ïa ka JAC bad ïa ki nongmihkhmat jong kitei ki kharkhana dewbilat sha ka meij jong ka jingïakren, ha Conference Hall jong ka Office jong u.
Ha katei ka jingïalang, kaba la pynïaid hi da u Deputy Commissioner jong ka district, u Manish Kumar, IAS, ha ryngkat ka jingïadonlang u Superintendent of Police, ka district, u Vivekanand Singh, IPS, bad ïa kaba la wan ïashim bynta lang, da ki nongmihkhmat jong ka Star Cement bad ka Dalmia Cement, lem bad ki nongïalam bad ki dkhot jong ka JAC, ka Star Cement, ka la mynjur bad kular ban ai trip (loading) noh ïa ki trok jong ka JAC, kat kum ba ki la dawa, kata, 9 trip ha ka shisngi. ïa katei ka 9 trip, 7 trip, da dei ka dewbilat lane clinker, kan dei sha ki thaiñ Khadlai Mer bad Sonapur, bad sa 2 trip pat, tang da ka dewbilat suda, sha ki thaiñ Silchar. Ha kajuh ka por, ka Star Cement, ka la kular ruh ba kan pynthikna bha ba, kan ym don shuh kano kano ka jingpynap slem ïa ki trok jong ka JAC, da dei ha ka jaka thep ne ha ki jaka pynhap mar.
Katba, ha ka jingïadei bad ka Dalmia Cement, ki nongmihkhmat jong ka, ha katei ka jingïalang, kim pat shym la lah ban ai ïa kano kano ka rai jong ki halor ki mat jingdawa jong ka JAC kaba ïadei bad ka Dalmia cement.
Ha ka jingïadei bad ka Star Cement, namar ba ka la kular ban pynïoh bad pyndep ïa ki mat jingdawa jong ka JAC, kumta ha ka General Meeting jong ka JAC, kaba la khot pynlong kyrkieh ha ka Sngi Ba ar ka la shim ïa ka rai ba, ïa ki trok kit dewbilat bad clinker jong ka baroh, yn ym bat shuh naduh mynta ka sngi, ha kane ka jingïakhih jong ka JAC.
Katba, ha ka jingïadei pat bad ka Dalmia Cement, namar ba kam pat lah ban ai ïa ka rai halor ki mat jingdawa jong ka JAC, kumta, ha katei kajuh ka jingïalang jong ka JAC, ka la rai ba, a baroh ki trok kit dewbilat bad clinker jong ka Dalmia cement yn dang ïai bat bad pynphai beit noh ïa ki sha ka jaka kaba ki la wan, ha kane ka jingïakhih jong ka JAC. Bad ba, lada jia ba ka Dalmia Cement kam sngap ne patiaw ia ki mat jingdawa jong ka JAC, ka JAC, kan nangpynjur shuh shuh nange shakhmat ïa ka jingïakhih jong ka pyrshah ïa ka Dalmia Cement.
Ha ka jingiadei bad ki bulker trok kiba la pyndonkam da ki kharkhana dewbilat kiba don ha East Jaintia Hills, ka jingpeitngor, jingbat bad jingpynphai kylla ïa ki kan dang ïai bteng kumba ju long man la ka sngi hi, ha kane ka jingïakhih jong ka JAC. Bad ruh, ha katei ka juh ka jingïalang jong ka JAC, ka la shim ruh ïa ka rai ba kan shim da kiwei pat ki sien jam kiba kham khor lada jia ym pynduh pyndam noh ïa kitei ki bulker trok. Kane ka long kat kum ka kyrwoh na u Ma Kyrshan Dkhar Secretary ka JAC.