Shillong, Ïaiong 29 : U Myntri ka tnad ka Koit ka Khiah ka Sorkar Jylla, Bah Wailadmiki Shylla ha ka sngi Balang u la ong ba shen ka sorkar kan sa shong bishar haba ïadei bad ka jingdawa ba la pynsngew da ki nongtrei jong ka 108.
Ha ka jingïakren bad ki lad pathai khubor, u Myntri u la ïathuh ba ka sorkar jylla kala dep ban thung da ka kynhun kaban bishar bniah halor ki ishu kiba la pynsngew da ki nongtrei ka 108 kiba dawa ba ka sorkar kan shimti hi noh ban pynïaid. Tangba ïa kane u ong ba kin sa kren bad ïatai sani tad haduh ban da wanphai u Mission Director ka NHM na ka jingleit kamram elekshon.
Ha ka jingïakren u Myntri u la ïathuh ba ïa kane ka mat ki hap ban ïatai sani namar na ka liang ki nongtrei 108 ki don la ki jong ki jong ki jingsngew bad ka sorkar ruh ka don la ka jong ki jingeh.
“Dei na kane ka daw ba ngi la thaw ïa ka kynhun ban wad bniah kumno ban leh halor kane ka bynta,” u la ong da kaba ïathuh ba ha ki jingïa kynduh kiba la dep u la dep ruh ban pynsngew ha ki halor kane bad mynta ki dang ap sa tang ïa ka kaiphod.
