Shillong, ïaïong 27: Ka Meghalaya Boxing Association (MBA) hynne ka sngi Nyngkong, ka 27 tarik u ïaiong ka la ïoh ba kan sdang ïa ka State Boxing Championship 2025-26 ba la wan ban ïashim bynta da ki khynnah ïalehkai kiba dang khie san kiba mihkhmat ïa la ki jong ki klob bad ki district.
ïa kane ka rynsan ïakura la pynlong ryngkat ka jingkyrshan jong ka tnat Directorate of Sports and Youth Affairs, bad la pynlong ïa ka ha madan Basketball jong ka Mawlai Mawroh Indoor Sports Hall.
Ha kane ka lympung, la phiah ïa ka jingïakhun ha ka kyrdan jong ki khynnah kynthei bad shynrang kiba 15-16 snem ne ba hap ha ka kyrdan ka junior bad kumjuh ha ka rta ïalehkai kiba la sdang ban khie ban san kiba 17-18 snem ka rta kiba hap ha ka thup jong ka youth, ïa kaba la nang phiah shuh shuh pat ïa ka kat kum ka jingkhia ki nongïalehkai kiba long kat kumba la pruid dak ïa ka ha ka kyrdan ialehkai jong ka National bad International, ïa kane la pynpaw ha ka kyntien pdiang sngewbha ba la ai da u technical director ka MBA bah Larry Kharpran.
Ha kane ka kynti ki nongwan ïashim bynta baroh kiba la wan ki long 105 ngut, na ki 8 tylli ki district bad kumjuh na ki kato katne ki boxing club.
Ban shu phai dien sha ka mynor, ka boxing ka la kham paw bha tang ha ki bynta ka East Khasi Hills, ïa kaba suki pa suki lyngba ka jingtrei shitom ki dkhot ka MBA, kane ka jingïalehkai la lah ban pynsaphriang ha kiba bun ki district kiba don ha ka jylla, ïa kaba la lah ban pynurlong ïa kane da ka jingïarap bad kyrshan borbah ka sorkar jylla tad haduh ban da lah ban lum lang ïa ki rang bad thei ïakura na kylleng sawdong ka jylla ha kawei ka lympung kaba dap da ki jingïakhun kaba jur ban sei madan ïa ka sap ka jingtbit ba u/ka khynnah ki don.
La wan plie pyrda ïa kane ka lympung da u Dy. Director Sports & Youth Affairs bah Paia War Nongbri, ha ka jingdon lang u General Secretary ka MSOA bah Finely L. Pariat, bah Ian Lyngdoh President ka Meghalaya Swimming Association, Rangbah Shnong ka Mawlai Mawroh, ki nongtrei na ka ophis u DSO EKHD bad kiwei kiwei.
La pynïaid ïa ka jingïalang plie pyrda da u bah Paia B. Synrem.
