Ha ka jingmang ba 265 klur tyngka khlem donkam ban siew bai jaka ong u MLA

Shillong, Iaiong 24 : U MLA ka Mawsynram Bah Olan Sing Suin, myn ha ka Sngi Thohdieng, ula ïathuh ba ka jingpyntrei ïa ka surok Phlangwanbroi-Ranikor ha ka jingmang pisa ba 265 klur tyngka kala sdang mynta bad ka jingpom khyndew ka la ïaid shaid shaid. Kaba sngewtynnad ba ïa kane ka surok la ïoh ban shna khlem da hap ban siew bai jaka.
“Ka surok kaba ngi la ïoh ïa ka jingbei tyngka ba 265 klur tyngka ka dei na Phlangwanbroi sha Ranikor, kaba ïasoh pat bad ka State Highway” ong u Bah Suin.
U bynrap ba ka jingpyntrei ïa kane ka surok ka la ïaid bha ha kaba ki machine ki la don ha kylleng ki bynta jong ka surok. “Nga kyrmen ba shisien ba la pyndep ïa kane ka surok, kan sa don ka jingkylla ha ka thaiñ jong ngi” ula ong.
U MLA u pyntip ba kane ka surok ba 47 km kan dei ka surok intermediate bad ka jingiar kan long kumba 55 meter.
“Na kane ka surok, 265 klur tyngka la mang kat kum ka tender, lait noh ka jingkieng Umpung namar ïa kane ngin hap ban thung consultant ban design bad tei ïa ka jingkieng, bad ïa kane ruh ngin sa pan pisa na ka World Bank” ong u Bah Suin.
Halor ka bai jaka, u Bah Suin ula ong ba ym donkam siew bai jaka satia sha ki trai jaka. “ïa kane ka surok ngim donkam ban siew bai jaka sha ki trai jaka namar nga ïohi ba kane ka surok ka dei kaba biang eh ba ngin ïoh” ula ong.
“Ki trai jaka ki la dep ïapynbeit lypa bad ka PWD ba ki la ai ei sngewbha ïa ka jaka bad kam don jingeh satia ban pynheh ïa ka surok” ula bynrap.