Rung Semi final ka Nonthymmai Academy bad ka Shillong Hr Sec. School ha ka SCA Inter School U-15
Shillong, ïaïong 23: Ka Nonthymmai Academy bad ka Shillong Higher Secondary School ki la pynthikna ïa ka jaka jong ki ha ka Semi final jong ka lympung Inter School Under 15 Cricket Tournament ba la pynïaid da ka Shillong Cricket Association, da kaba jop ïa la ki jong ki jingïakhun Quarter final hynne ka sngi Palei.
Baroh ar tylli ki kynhun ki la jop da 5 wiket, ha kaba ka Nonthymmai Academy ka la jop pyrshah ïa ka Nonthymmai Nepali School, nangta ka Shillong Hr Sec. School ka la pynliem noh ïa ka Sunrise Academy.
Haba sdang boling nyngkong hadien ba jop ïa ka jingkynting pisa (toss) ka Nonthymmai Academy ka la weng noh ïa baroh 10 wiket jong ka Nonthymmai Nepali School tang na ka bynta 113 ron haki 20 ober.
Ki nongtied kiba kongsan jong ka Nonthymmai Nepali School ki long u Raj Paswan (41 ron naki 32 bol) bad u Runu Sinha (30 ron naki 31 bol). Katba u Avishkar Chettri (khur 3/18 naki 4 ober) bad u Sushant Thapa (khur 2/6 naki 2 ober) kidei ki ar ngut ki nongkawang bol ba seisoh jong ka Nonthymmai Academy.
Nangta ka Nonthymmai Academy ka la pyndep ïa ka kamram da kaba khyllem 5 wiket ban kamai 114 ron haki 18.3 ober. La lamkhmat ïa ka tied da u Avishkar Chettri da 27 ron naki 30 bol, katba u Roshan Kumar u la khur 2/21 naki 4 ober.
Na ka bynta ka jingïalehkai ba kyrpang ha baroh ki liang, u Avishkar Chettri (27 ron ha ka tied bad khur 3 wiket ha ka boling) u la ïoh ban khur ïa ka khusnam Player of the Match.
Ha ka Quarter Final kaba bud, ka Sunrise Academy ka la tied pyndep ïa ki 20 ober bad ka la lah ban kamai tang 109 ron katba khyllem 6 wiket. La lamkhmat ïa ka tied da u D Rajdeep Singh (30 ron naki 34 bol) bad u Vidhan Ruchal (23 ron naki 28 bol). U Fredrick Kharsyntiew jong ka Shillong HSS, u la khur 2/4 haki ober.
Haba beh ïa ka thong, ka Shillong Hr Sec. School ka la lah ba kan kynjoh 113/5 haki 16.5 ober, ha kaba u Mewanai Kongbuh u la noh synñiang 39 ron naki 49 bol.
ïa ka khusnam Player of the Match la khur da u Rajdeep Gush uba la kamai 19 ron bad khur 1 wiket.